Durante Kampanha Situasaun Dili Hakmatek

DILI, STLNEWS.co – Partidu politiku sira halo kampanha durante semana ida ona, situasaun iha kapital Dili lao hakmatek kompara ho tinan lima ba kotuk.

Komandante Operasional Superintendente Xefe Jose Soares hatoo kestaun nee liu husi nia esplikasaun, bainhira sai hanesan orador ba iha Serimonia Nasional, neebe realiza iha Salaun Delta Nova, Dili, Kinta nee (27/04/2023).

Nia dehan, iha loron 11 Abril sira konvida lider organizasaun arte marsiais sira, hodi enkontru ho Komando PNTL atu fahe responsabilidade hodi kontrola sira nia ema sira.

Atu nunee sira mos bele koopera diak ho polisia, hodi bele garante estabilidade durante tempu kampanha ka eleisaun nomos post eleisaun.

“Ita boot sira hatene, ohin loron semana ida resin, ita bele haree kampanha durante semana ida resin, kompara ho tinan lima ba kotuk, iha mudansas,” dehan nia.

Tanba nee, husu ba partidu poltiku sira oinsa mak bele servisu hamutuk ho polisia, nunee durante kampanha labele hamosu insidente no asidente balun neebe mak ema hotu la hakarak.

Nia konta, durante nee partidu poltiku sira nia liafuan moos, sira kontrola ho diak, aleinde nee sira mos kria grupu Whatshaap ho Lider Partidu sira hotu, nunee bele partilha informasaun ba lider sira, saida mak bele halo, halo rezumu, liu-liu ba iha dekretu lei numeru 18/2017, konaba regulamentu kampanha eleitoral nee nian. Saida mak bele halo iha kampanha nee nia laran, no saida mak labele halo.

“Maske iha insidente balun neebe mak kontese iha munsipiu Vikeke no Baukau,” dehan nia.

Maski nunee, iha komando munisipiu sira mos halo aprosimasaun neebe mak hanesan, neebe mak partisipativu, hodi hanmosu hanoin halo faktornidade munisipal, atu kesi metin partidu poltiku sira, saida mak labele halo, no saida mak labele halo.

Iha parte ketak, Komandante PNTL Munisipiu Dili, Superintendente Xefe Polisia Natercia Eufrazia Soares haktuir, iha tempu kampanha nia laran hamosu dunik asidente balun, iha tempu balun krimi laiha, maibe asidente iha, iha tempu balun asidente laiha krimi mak iha.

Maibe asidente sira nee mosu foin daudaun iha fulan kotuk mak mosu iha Hera fatal, no sira mos rejistu dunik asidente nee fatal.

Maibe iha loron hirak nee nia laran mosu dunik asidente ema kanek, mais laiha fatal.

“Kampanha iha Dili seidauk iha relatoriu katak iha asidente neebe mosu durante mobilijasaun militantes sira,” hakotu nia.

Nunee mos Visi Prezidente Organizasaun Registrasia Sagrada Familia (ORSF), Asala Vicente hatutan, povu nee matenek ona, tanba durante tinan 20 resin ona, depois de independensia prosesu eleisaun festa demokrasia dala hira tiha ona povu hatene, tanba durante nee situasaun jeral lao hakmatek los durante kampanha.

“Joven no arte marsiais sira mos komesa komprende situasaun saida mak hahu, no situasaun lao normal,” dehan nia.

Nia hateten, ba oin presiza CNE ho STAE hamutuk ho entidades hotu, presiza fo edukasaun sivika prosesu eleisaun, festa demokrasia, para ema hotu bele intende.

Tanba nee, nia husu ba lider sira atu kampanha kolia mak programa, nunee bele loke dalan ba jerasaun foun sira neebe tuir mai.

(efi)

LEAVE A REPLY

Please enter your comment!
Please enter your name here