DILI, STLNEWS.co – Eis Ministru Interior husik hela servisu lubuk ida ba atual Ministeiru Interior, hafoin termina mandatu. Tanba nee, atual Ministru Interior Francisco Guterres promete sei esforsu makaas hodi kompleta servisu hirak nee, aleinde planu prioriedade neebe mak sira iha.
Atual Ministru Interior Francisco Guterres hatoo kestaun nee ba jornalista sira, bainhira remata entrega poder iha salaun MI, Vila-Verde Dili, Segunda (03/07/2023).
Nia dehan, ohin mos membru governu sesante sira, ho tan eis Visi Ministru Interior no Eis Sekretariu Estadu Protesaun Sivil (SEPS), sira brifing hela konaba saida mak sira halo durante tinan hira nia laran.
Nia hateten, depois sira mos haree konaba ohin nee no sei fo kontinuidade ba servisu balun, no sira mos iha prieoridade lubuk boot ida, neebe mak sira hatur hela, para ba oin bele dehan katak, iha 120 dias nee pelumenus saida mak sira presiza halo too hotu.
“Agora kestaun sira seluk depois mak ita buka solusaun, mais hau promete katak 120 dias nee, ami sei halo, ami sei rezolve problema balun neebe presiza rezolve hanesan ohin fo hatene, para ita bele halao servisu ho diak liu tan,” dehan nia.
Nia hatutan, daudaun nee nia seidauk lee rekomendasaun neebe mak hatama husi Sesante Interior, mais iha kestaun infraestrutura sira, tanba ohin iha brifing nee, Visi Ministru sesante fo hatene ona katak, iha kestaun infraestrutura, iha kestaun politika balun, kestaun servisu operasaun balun, inklui mos Prortesaun Sivil.
Nia hatutan, hahu ohin ba oin, sira so husu deit para hotu-hotu tenki iha kolaborasaun diak, i povu tomak nia kolaborasaun para sira bele hametin seguransa nasional, atu bele fo kontinuidade ba dezenvolvimentu neebe mak sira hakarak atu alkansa iha 20-30 nee rasik.
Aleinde rekrutamentu ba PNTL, nia mos promete sei haree konaba preokupasaun rekrutamentu PNTL foun nian, atu nunee bele hakman servisu seguransa rai laran ho diak.
“Sim ita haree hotu ba ida nee, oinsa ita atu haree hodi moderniza no bele halo tiha reforma ba ida neebe diak, ba iha setor seguransa nee rasik, atu bele halao servisu ho diak,” dehan nia.
Nia esplika, sira mos sei 120 dias, tanba nee sira tenki redefini fila fali kestaun ameasa ba iha pais ida nee, ameasa ba pais ida nee saida, mak sira sei defini fali, tanba uluk sira hetan tiha, no defini tiha ona, mais sira redefini fali, tanba ho revolusaun tempu nee, atu haree katak ameasa ida nee, ida neebe lo-loos, para depois bele dezenvolve setor seguransa nee, atu bele responde ba ameasa hirak neebe mak iha.
Iha biban nee, Eis Visi Ministru Interior (VMI), Antonio Armindo hateten, konaba rekomendasaun nee hanesan kondisaun servisu fatin, infraestrutura, eskuadra sira, Komando Munisipiu mai too nasional, aprezenta mos ba ministru foun katak, tanba sira iha ona dezena foun, neebe mak protetaip, hanesan deit, aplika ba eskuadra hotu iha Timor laran tomak.
Tuir nia, hanesan mos eskuadra Dom Aleixo nian, depois sira nia rekrutamentu ba polisia nee sai mos rekomendasaun ba ministru foun, tuir fali mak parseiru internasional sira, atu kontinua nafatin ho parseiru sira neebe mak servisu hamutuk ho Ministeriu Interior, ho PNTL, ho Protesaun Sivil, no servisu Migrasaun, hotu-hotu kontinua nafatin.
Rekomendasaun lubuk ida, balun sensitivu, tanba nee nia hanoin labele koalia hamutuk ho diresaun sira hanesan ohin neebe iha enkontru, maibe sira brifing ona Ministru Interior.
Aproveita biban ida nee mos, eis Visi MI nee agradese ba diresaun nasional hotu, diretor sira hotu, komandante hotu, membru polisia hotu, membru servisu migrasaun, Protesaun Sivil sira hotu, ba sira nia apoiu tomak ba governu ida nee.
(jen)
