DILI, STLNEWS.co – Chefe do Estado Maior General FALINTIL Forsa Defeza Timor Leste (F-FDTL), Tenente General Domingos Raul “Falur Rate Laek” husu ba Atual Ministru Defeza Pedro Klamar Fuik, tenki tau prioridade ba dezenvolvimentu militar durante nia mandatu.
Chefe do Estado Maior General FALINTIL Forsa Defeza Timor Leste (F-FDTL), Tenente General Domingos Raul “Falur Rate Laek” hatoo kestaun nee ba jornalista sira liu husi intervista, bainhira remata hasoru malu ho Atual Ministru Defeza Pedro Klamar Fuik iha Salaun Reuniaun Kuartel Geral F-FDTL Fatuhada, Dili, Segunda (03/07/2023).
Nia dehan, Ministru Defeza mai komprimenta sira nain rua, hodi aprezenta aan katak nia ba ona ministru, no simu ona tomada de pose, no iha biban nee sira mos tur hodi koalia oituan konaba situasaun jeral forsa nian, ezonerasaun nian, nomos koalia konaba saida mak bele halo servisu ho diak, hodi hadia instituisaun nian ho koneksaun, prosesu tomada desizaun hirak nee ho Ministeiru Defeza ho Forsa Armadas ba prosesu admnistrasaun no jestaun loron-loron nian.
Nia hateten, agora prioridade ba nia, ba halo primeira atividade Konselhu Ministru nian. Depois ida nee sei haree para depois sira mai hanesan resepsaun ida neebe ofisial. Depois ministru, asesor ida misaun hotu ona nee, iha prosesu entrega transferensia, atividade, relatoriu, depois sei halo tan fali parada despedida nian ba ministru foun.
Nia hatutan, servisu administrasaun nian, hanoin tinan klaran ona buka hatene took orsamentu sira neebe iha ministeriu neeba nee, osan neeba aloka ba nee pursentu hira ona, haree no gastu tuir sira nian, tanba nee buka hodi aprezenta planu ratifikasaun ruma konaba osan ba iha governu para bele haree.
“Prioridade mak dezenvolvimentu forsa nian nee, no prioridade liu-liu ba infraestrutura sira, apoiu sosial ba forsa nia familia, nee para forsa sira labele ba mete tun mete sae, labele ba halo tunsae, labele ba halo problema, nee prioridade bem star sosial forsa nian, neste kazu infraestrutura ba militar sira, tenki hadia ida nee,” dehan nia.
Tuir nia, tenki iha mos orsamentu, para iha sira nia partisipasaun hirak nee, depois sira nia partisipasaun iha atividade internasional sira, hanesan reuniaun sira, agora tama ona iha ASEAN, maski Timor sei iha estatutu hanesan observador, maibe partisipasaun ona iha setor hotu-hotu no iha area hotu-hotu.
(efi)
