DILI, STLNEWS.co – Organizasaun Non Governamentais Fundasaun Mahein (FM) husu ba figura foun neebe lidera Instituisaun Polisia Nasional Timor Leste (PNTL), Komisariu Henrique da Costa nomos Segundu Komisariu Pedro Belo, tenki halo mudansa ba servisu iha instituisaun nee.
Diretor Ezekutivu Fundasaun Mahein (FM), Abel Amaral hatoo preokupasaun nee ba jornalista sira iha nia knaar fatin Bairo dos Grilhos, Dili, Kinta nee (16/03/2023).
Nia dehan, Fundasaun Mahein fo parabens ba Komandante Jeral ho Segundu Komandante Jeral foun, neebe mak hetan fiar husi governu hodi lidera Instituisaun PNTL.
“Fundasaun Mahein husu ba lider nain rua neebe mak hetan fiar husi governu, atu bele lidera Instituisaun PNTL ho diak liu tan, tanba publiku hein, ho lideransa foun nee bele iha mudansa,” dehan nia.
Nia hateten, tanba kazu ida ka rua neebe mak too agora publiku hein hela nia prosesu investigasaun nee lao ona too iha neebe, liu-liu kazu Jose Bernado neebe mak mate iha sela polisia, too agora familia vitima nomos publiku hein hela prosesu Jose Bernado nia mate nee, mate tanba saida.
Nia hatutan, ho nomeasaun foun nee aserka loos ho eleisaun parlamentar, nunee husu atu Komandante Jeral PNTL ho Segundu Komandante Jeral PNTL foun atu atensaun mos ba asuntu nee.
Tanba pubilku hotu hatene, numeru PNTL nee menus, maibe oinsa mak politika atu bele asegura eleisaun nee bele lao ho diak, maibe la signfika katak, pas no estabilidade molok depois de eleisaun parlamentar, nee laos iha PNTL nia liman, laos iha F-FDTL nia liman, maibe responsabilidade pas no estabilidade nee iha sidadaun hotu hotu nia liman.
Maibe buat hirak nee hotu hanesan trabalho da Casa ba Komandante Jeral no Segundu Komandante foun, atu bele refleta nomos atu bele oinsa ba oin, instituisaun nee bele halao srvisu ho diak liu tan.
Tanba nee, nia husu ba figura foun rua nee, bainhira ba sira neebe mak viola regras tenki toma responsabilidade neebe seriu, imediata, atu nunee konfiansa publiku nee nafatin mantein ba iha setor seguransa liu-liu iha PNTL.
(efi)
