DILI, STLNEWS.co – Governu liu husi reuniaun Konselhu Ministru aprova ona proposta neebe aprezenta husi Ministru Defeza, husu atu rekruta tan membru foun FALINTIL – Forsa Defeza Timor Leste (F-FDTL).
“Konselhu Ministrus delibera ona atu aprova, tuir projetu neebe aprezenta husi Ministru Defeza ba realizasaun ba prosedimentu exesional ba rekrutamentu militar nian, hahu husi fula Maiu tinan 2023, no determina ona katak efetivu atu inkorpora iha prosedimentu ida nee, inkorporasaun sei rekruta hamutuk ema nain 87,” dehan Ministru Prezidensia Konselhu Ministru (MPKM), Fidelis Leite Magalhães hafoin remata enkontru Konselu Ministru iha Palasiu Governu, Kuarta (26/04/2023).
Nia dehan, husi numeru ida nee fahe ba militar nain 29 ba Kuartel Jeneral, nain 10 ba Komponente Terrestre, nain 12 ba Komponente Naval, nain 6 ba Komponente Aerea Lijeira, nain 5 ba Sentru Instrusaun Komandante Nicolau Lobato, nain 18 ba Unidade Apoiu Servisu, nain 4 ba Unidade Polisia Militar, nain 3 ba Unidade FALINTIL.
(efi)
