DILI, STLNEWS.co – Ministru Interior (MI) Francisco Guterres hateten, Ministeriu Interior (MI) sei reve hotu estatutu Polisia Nasional Timor-Leste (PNTL) inklui diplomas legais iha instituisaun polisia, atu bele dignifika membru PNTL sira, inklui sira neebe foin daudaun pasa ona ba reforma.
“Ita sei halo revizaun total ba lei no diploma legal sira iha PNTL laran , hahu husi sira nian kareira, rejimi, salarial, para depois sira bele dezempenha sira nian papel nee ho diak,” hatete Ministru Interior (MI) Francisco Guterres ba jornalista sira, hafoin remata vizita ba iha Kuartel Komando Jeral PNTL Kaikoli, Dili, Sesta (14/07/2023).
Nia dehan, presiza halo revizaun ba kestaun legál iha PNTL, atu nunee fo tratamentu ba membru PNTL sira, liu- liu kria kondisaun, bainhira sira pasa reforma, tanba membru PNTL sira nee pesoa ida importante, treinadu no estadu investe sira barak, tanba nee kuandu membru PNTL ida atu ba reforma nee presiza kria kondisaun ba sira, hanesan membru reformadu nain 158 oinsa governu trata sira, valoriza sira ho diak, molok pasa ba reforma.
“Ita sei halo revizaun ba estatutu PNTL atu bele dignifika sira neebe reforma, ida nee tama hotu ona ami nia planu atu halo ida nee,” nia tenik.
Iha fatin hanesan, Komandante Jeral PNTL, Komisariu Henrique da Costa esplika, hanesan Komandante Jeral apoia planu no programa Minsiteriu Interior atu halo revizaun ba rejimi kareira no rejimi salarial ba PNTL.
“Governu halo revizaun ba rejimi salarial PNTL nee diak, hadia salariu baziku ba PNTL diak liu, duke ida be subsidiu. Misteriu Interior hakarak aumenta salariu baziku ba PNTL, ita tenki agradese ida nee,”nia informa.
Komisariu Jeral PNTL nee kontinua dezafia Komadante Muninisipiu no membru sira hotu atu kontinua presta servisu diak liu tan iha terenu, liu husi melhora atendimentu publiku liu-liu ba komunidade sira.
(jen)
(jen)
