DILI, STLNEWS.co – Ekipa husi Japaun halao vizita ba iha Prizaun Bekora, hodi haree kondisaun prizaun nian nomos sei fo apoiu ba guarda prizional sira.
“Atu fornese formasaun ba iha guarda prizional sira, no ida nee mos iha programa vizita prizaun, hodi haree situasaun iha prizaun laran nomos guarda sira nia situasaun,” dehan Diretor Prizaun Bekora, Joao Domingos ba jornalista sira iha Prizaun Bekora, Tersa (18/07/2023).
Nia hatutan, objetivu importante mak atu fo formasaun ba guarda prizional sira, konaba jestaun ba servisu prizional nian no formasaun nee sei halao durante loron tolu.
Nia esplika, oras nee daudaun iha prizaun Bekora iha kondenadu hamutuk 447, iha mos feto nain 4 neebe halo hela tratamentu.
Nunee husi numeru neebe iha prizaun preventiva hamutuk 87, no restu husi numeru neebe iha tama hotu iha prizaun kondenadu. Iha mos estranjeiru nain tolu, Indonezia nain 2 no Bulgaria nain 1.
Iha fatin hanesan, Deputy Diretur Of UNAFEI, Junko Irie dehan, objetivu vizita nee atu haree kondisaun prizaun nian, no sei fo apoiu formasaun ba guarda sira.
“Ami nia vizita nee ho objetivu ida atu haree kondisaun prizaun nian, no sei fo apoiu formasaun liu husi ami nia programa sira,” dehan nia.
Nia hatutan, programa neebe sira halao fundu mai husi Governu Japaun no MNEK Japaun mak oferese orsamentu no UNAFE mak jere.
(ter)
