DILI, STLNEWS.co – Komando FALINTIL – Forsa Defeza Timor Leste (F-FDTL) realiza ezersisiu harii hamutuk, neebe mak junta hamutuk militar husi nasaun 5, ho objetivu atu fahe konhesimentu ba malu konaba servisu militar nian.
Liu husi diskursu Xefi Estadu Maior Jeneral F-FDTL, Tenente Jeneral Domingos Raul Falur Rate Laek hatete, loron ohin marka ezersisiu hari hamutuk ba dala XI.
“Ezersisiu anual ida neebe sai nudar sinal ba ita nia kooperasaun kontinua atu fahe konhesimentu, neebe ba F-FDTL nudar rikusoin ida atu prepara aan hasoru dezafiu sira iha futuru,” tenik nia iha Metinaro, Segunda (28/08/2023).
Nia parte agradese ba Komandante sira husi Australia, Estadus Unidus Amerika, Nova Zelandia no Japaun, ba sira nia komitmentu.
Nia hatete, liu husi formasaun bazeia ba abilidade enjenaria no troka tematiku sira mak oportunidade atu halo buat barak, hametin interoperabilidade entre forsa partisipante sira, hasae kapasidade komun atu halao atividade defeza sira iha kooperasaun ho nasaun sira iha rejiaun, no hadia preparasaun ba kombate koletivu ba operasaun kompleksu sira.
Nia akresenta, iha eventu sira hanesan hari hamutuk, nee serbisu iha ambitu multilateral hodi kumpre kompromisu hirak nee.
“Obrigadu ba militar sira husi Forsa Armada Australia hamutuk nain nenulu-resin-lima , husi Forsa Estadus Unidus Amerika nain sanulu-resin-sia husi Forsa Nova Zelandia nain haat , Forsa auto-defeza Japaun nain sanulu- resin-tolu, hamutuk ho F-FDTL nain atus ida tolu nulu,” nia tenik.
Nia akresenta, F-FDTL hakarak servisu hamutuk ho nasaun hotu hotu iha rejiaun hodi hasoru dezafiu komun sira hodi mantein pas no prosperidade.
Iha fatin hanesan, Enkaregadu Negosiu Estadu Unidus Amerika Marc Weinstock hateten, Estadus Unidus Amerika kompromete atu mantein kooperasaun iha area defeza no seguransa.
“Estadus Unidus Amerika komprometidu hodi ajuda Timor-Leste hodi harii Timor Leste nian kapasidade militar hodi asegura ninia fronteira sira,” nia dehan.
Enkuantu, iha fatin hanesan, Embaixadora Austrália iha Timor-Leste, Caitlin Wilson, hatete, Austrália iha komitementu atu kontinua hametin kooperasaun Timor Leste liu husi erzersisiu harii hamutuk inklui kontinua kapasita militar F-FDTL iha lingua ingles.
Ezersisiu harii hamutuk nee kompostu husi militar nasaun 5 mak hanesan Japaun, Nova Zelandia, Estadus Unidus Amerika, FALINTIL-Forsa Defeza Timor Leste no Australia.
(mar)
