DILI, STLNEWS.co – Komando Polisia Nasional Timor Leste (PNTL) Munisipiu Dili liu husi Seksaun Tranzitu Seguransa Rodaviaria hahu husi fulan Janeiru too Agostu kontribui ona reseitas hamutuk US$ 267,862 ba kofre estadu.
Tuir Komandante Polisia Munisipiu Dili, Superientende Xefe Orlando Gomes katak, reseitas neebe kuntribui ba kofre estadu rekolha husi auto stop neebe mak Seksaun Tranzitu Munisipiu Dili halo ba movimentu teransporte iha estrada publiku durante fulan 7 nian laran.
“Liu husi auto stop nee mak ita konsege kontribui ona reseitas hamutuk US$ 267,861 mil ba kofre estadu durante Janeiru too Agostu nee,” dehan nia ba jornalista sira iha Kaikoli, Dili, Segunda (18/09/2023).
Nia dehan, iha Janeiru kontribui reseitas ba kofre estadu hamutuk US$ 38,363, fulan Fevreiru iha US$ 27, 169 no Marsu iha US$ 27,861, Abril US$ 20,767, Maiu US$ 64 mil, Junhu iha US$ 19 mil, Julhu US$ 34 mil no iha Agostu hatama osan ba kofre estadu hamutuk US$ 359 mil resin.
“Reseitas hirak nee ita rekolha husi tabela infrasaun neebe ita aplika ba infrator sira durante nee,” katak nia.
Nia dehan, tabela nia infrasaun nee aplika ba transporte sira neebe mak kondus iha kapital Dili la kompletu asesores, nunee mos laiha Karta kondusaun, nunee mos kontra ordem publiku.
Nia akresenta, ba motorista no kondutor sira neebe mak polisia prende ona imi nia transporte tenki kumpri no selu iha banku, nunee bele mai foti ona, kuandu asegura too fulan tolu mak nain la mai hasai tenki prosesu ona ba patrimoniu estadu.
(mar)
