DILI, STLNEWS.co – Komisaun Rekrutamentu (KR) ba rejime espesial FALINTIL-Forsa Defeza Timor Leste (F-FDTL) 2023 halao avaliasaun ba dokumentus aplikante sira bazeia ba sistema neebe mak estabelese ona.
Lia hirak nee hatoo husi Responsavel Tekniku ba Komisaun Rekrutamentu Rejime Espesial F-FDTL 2023, Major Helio da Costa ba jornalista sira iha Quartel General, Fatuhada,Dili, Tersa (14/11/2023).
“Kriteiru neebe ami fo sai no estabelese nee laos fasil mos, nee tanba intensaun hakarak buka ema neebe kualifikadu atu mai apoiu tan iha iha F-FDTL, iha area neebe mak foo sai,” dehan nia.
Nia hatete, komisaun kontinua halao nia servisu, maibe iha faze ida agora iha painel sira nia liman, tanba nee mak iha faze lubuk ida iha sistema nee, sistema nee mak halo rekomendasaun husi liur labele simu, tanba sistema nee nia nain rasik mak submete.
Nia informa, molok atu taka naran nee sei manda fila ba aplikante haree uluk atraves husi sira nia konta sira neebe mak uluk sira utiliza hodi aplika.
“Ami manda ba sira nia konta nee iha faze rua neebe ami komisaun halo pre selesaun ho abilitasaun literaria, tanba nee komisaun sira avalia hela,” katak nia.
Kontinua ba pajina 2
Iha sorin seluk, Major Juri interna, Rui Soares hatete, relativamente iha prosesu avaliasaun ba habilitasaun literaria nee dezde momentu seidauk iha reklamasaun.
“Tanba ami husi painel, ami bazeia ba saida mak komisaun fo, ensima de tudo buat hotu neebe mak ami halo bazeia ba kriteria neebe estabelesidu,” dehan nia.
Nia dehan, sistema nee kapas, portantu foin mak lao ho sistema foun kompara ba kotuk, mai ho evolusaun nee ohin loron tama iha dijital obriga individu no kandidatu neebe mak iha intrese nia rasik mak hatama, entaun laiha ema ruma mak submete nia dokumentus.
Entretantu, Painel Juri Externa husi Hospital Nasional Gidu Valadares, Doutor Mendes Pinto akresenta, husi parte saude iha aplikantes por volta 86 neebe husi area ketak ketak iha juri nain 3.
“Forsa sira foo sira nia kriteira presiza buka ema neebe esperensia iha area saude, iha area espesialidade saude nian,” katak nia.
(mar)
