Komjer Aprezenta Krimi 2023 Ba PR Horta

DILI, STLNEWS.co – Komandante Jeral (Komjer) Polísia Nasional Timor Leste (PNTL), Komisariu Polisia Henrique da Costa aprezenta krimi neebe akontese iha tinan 2023 ba Prezidente Republika (PR) Jose Ramos Horta.

Bainhira remata hasoru malu, Komandante Jeral PNTL, Komisariu Polisia Henrique da Costa ba jornalista sira iha Palasiu Prezidensial Bairo Pite, Tersa (16/01/2024).

Nia hatete, ohin hasoru malu ho Prezidente Republika, komprimenta ba Xefe Estadu.

“Ita mos aprezenta ba iha Prezidente Republika konaba krimi neebe akontese iha 2023 nian, depois ita haree ba iha 2024 nian nee medida saida mak parte seguransa ninian halo, nunee bele prevene krimi iha 2024 nian,” hatete Komando Jeral.

Komandante Jeral hatete, nia mos informa ba Xefe Estadu katak, komando orienta ona ba nia komandante sira hotu, nunee hasae atividade vijibilidade polísia ninian.

“Ita mos halo ita nia atividade vizita ba komunidade, eskola sira, nunee hodi sensibiliza mos lei sira konaba kodigu prosesu penal ninian, nunee mos konaba servisu polisiamentu komunitariu ninian. Ita orienta ita nia komandante munisípiu sira atu halo ida nee,” katak Komjer.

Komjer hatutan, krimi neebe akontese iha tinan 2023 mak ofensas integridade fizika simples, “Krime 2023 numeru neebe aas liu nee ita identifika katak, ofensas integridade fízika simples ninian 1000 ital ita kompara 2022-2023 ninia numeru nee sae oituan, maibe ita haree katak esforsu tomak neebe PNTL halo, ema hotu-hotu ninian ita asegura buat hotu iha 2023 nian,” katak nia.

Komandante husu nafatin ba parte komandante sira, liu-liu ba servisu investigasaun nian, nunee kazu neebe mosu, halo prosesu ho rigor, nunee autor sira ka suspeitu sira nee tenki ba hatan sira nia hahalok nee tuir lei haruka.

Nia hatutan, dala ruma rona katak GAM-GAR kontribui mos ba ida nee, maibe haree katak lae, maibe dala ruma hemu tua lanu tiha fatin ruma depois provoka malu, dala ruma sira iha tiha problema pasadu ruma, depois sira provoka malu nee mak kontribui ba iha krimi neebe akontese iha 2023 nian.

Aleinde nee, Komjer mos hatete, konaba polisia neebe antes nee reforma no tama fali ona servisu no agora ativu hanesan polisia, sira nia prestasaun servisu idak-idak tuir orientasaun komando neebe fo ba sira.

Iha biban nee, Prezidente Republika Jose Ramos Horta mos hatoo parabens no apresiasaun ba Komando PNTL ba nia esforsu tomak neebe fo orietasaun ba nia membru sira halao servisu ho diak, hodi atua situasaun iha tempu natal no tinan foun.

Xefe Estadu mos husu PNTL kontinua halao knaar ho profesional tuir lei no ordem neebe iha, nunee halao knaar ho profesional ba oin.

Foin lalais Primeiru Ministru Kay Rala Xanana Gusmao mos hatoo apresiasaun ba Polisia Nasional Timor Leste nomos membru Forsa Falintil Timor Leste neebe durante atu situasaun jeral iha Timor laran tomak hahu husi Natal too tinan foun situasaun hotu lao hakmatek.

(eme)

LEAVE A REPLY

Please enter your comment!
Please enter your name here