DILI, STLNEWS.co – Sidadaun ho naran Carlos do Santos hatete, Polisia Nasional Timor Leste (PNTL) halao knaar ho responsabilidade tuir lei no ordem.
“Ita nudar sidadaun, esperansa ba PNTL atu kontinua sai parseiru diak ba povu tomak, hodi halao knaar ho responsábilidade tuir lei no ordem, labele sai inimigu ba ami povu kiik sira, tanba kazu polisia baku ema iha,” hatete Carlos dos Santos ba STL iha Timor Plaza, Sesta (14/04/2023).
Nia dehan, PNTL nomos F-FDTL luta ba nasaun RDTL ida nee, maibe sira mos tenki respeitu ba povu kiik sira, liu-liu juventude sira, tanba kuandu juventude sira halo problema sira mai laos asegura, maibe hetan tuku no tebe.
“Ita hatene katak PNTL no F-FDTL mak lutu ba nasaun ida nee, tanba nee ami mos respeitu, maibe dala barak joven sira halo problema sira laos mai fo asegura, maibe mai baku fali, tanba nee sira tenki servisu ho responsabilidade tuir lei no ordem, labele tuir sira nia hakarak,” nia esplika.
Iha fatin ketak, sidadaun Joao da Silva Pires, tuir nia observasaun jeral ba servisu membru PNTL nian durante nee diak tebes ba nasaun no povu ida nee, maibe membru balun nakar hodi baku juventude sira.
“Durante nee hau haree membru balun nakar, maibe ita haree ninia prosesu nee hanesan baibain, ita kompara ho membru F-FDTL, membru forsa nee kuandu sala ruma, sira nia boot foti kedan asaun, no halo ida nee sira tauk”, nia afirma.
Antes nee Komandante-Jeral PNTL Komisariu Jeral Henrique da Costa husu ba membru Polisia Nasional Timor-Leste (PNTL) tomak atu labele sai inimigu ba povu, no tenki prevene envolve iha atividade organizasaun Partidu politiku.
(jen)
