DILI, STLNEWS.co – Polisia Nasional Timor Leste (PNTL) liu husi ekipa konjunta neebe servisu husi Servisu Informasaun Polisia (SIP), Servisu Nasional Intelejensia (SNI), Unidade FALINTIL no Departementu Investigasaun Kriminal (DIK), Intelejensia Makikit, hamutuk Eskuadra Nain Feto prende sigaru ilegal neebe sidadaun ho inisial QN lori tama mai sidade Dili.
“Hodi kalan ita hetan informasaun liga ho sigaru ilegal neebe tama too iha kapital Dili, iha informasaun neebe hatoo mai husi Eskuadra Nain Feto, maizumenus iha tuku 12:00 kalan, ita partrolha, sira too kedas iha fatin neeba. Bazeia ba ita nia intelejen Makikit sira, ita konsege prende duni sigarau ilegal iha Merkadu Taibesi,” dehan Komandante PNTL Munisipiu Dili, Superientendente Xefi Polisia Orlando Gomes ba jornalista Sira iha Komando PNTL Munisipiu Dili, Tersa (10/10/2023).
Nia dehan, sigaru ilegal 402, sigaru Marka Thanos no sigaru Surya 12 199 neebe mak PNTL prende.
“Sigaru sira nee ita lori ona mai iha Eskuadra Nain Feto no ita halo ona investigasaun, suspeitu sira ita hatama ona iha sela nomos hodi hein prosesu investigasaun, ita aprezenta ba iha Ministeriu publiku,” nia esplika.
Nia informa, iha suspeitu inisial QN neebe ho kareta Gran Max, nia husi Minisipiu Bobonaro, maibe hela iha Merkadu Taibesi, sira nia sigaru ilegal nee sira fo ba kios kiik sira hodi faan, sira la liu husi alfandega, liu dalan ilegal mai too iha Merkadu Taibesi.
(jen)
