Major F-FDTL Nain 9 Tuir Formasaun Protesaun Sivil

METINARU, STLNEWS.co – Ofisiais Major FALINTIL Forsa Defeza Timor Leste (F-FDTL) nain-9 tuir formasaun Protesaun Sivil hodi fo apoiu ba komunidade sira, bainhira akontese dezastres naturais iha rai laran.

Bainhira remata abertura kursu Protesaun Sivil nee, reprezentante Xefi Estadu Maior Jeneral FALINTIL-FDTL, Koronel Cesario Salustiano Marsal Ximenes “HAKSOLOK” liu husi intervista hateten, foin ba dahuluk F-FDTL realiza formasaun kursu konaba Protesaun Sivil nian, nee nia dever ka misaun nee bainhira kuandu mosu dezastre ruma, Protesaun Sivil mak iha neeba.

“Tanba nee mak ita nian Forsa Militar pela primeiru vez tuir kursu ida nee. Kursu ida nee esensial ba ita nia membru F-FDTL sira, ita nia membru nain 9 mak tuir kursu intensivu ida nee, hamutuk ho Forsa internasional sira,” dehan nia ba jornalista sira iha Sentru Instrusaun Nikolau Loubato Metinaru, Dili, Segunda (19/06/2023).

Nia dehan, sira nee liu-liu husi Forsa Malazia, Australia, nasaun rua nee, no instruktur sira nee mesak mai husi ema internasional.

Nia informa, membru FDTL sira nee aprende liu-liu oinsa halo protesaun ba ninia komunidade, se dezastre ruma mosu saida mak sira atu halo, ida nee dever ida neebe importante tebes.

“Ita boot sira akompnha iha tinan 2021, akontese 4 de Abril, ita hotu hotu hatene, ami rasik liu-liu Forsa Militar rasik tun ba, mais seidauk aprende ka tuir materia ruma, maibe ami ho esforsu rasik, tun ba hodi proteje ita nia komunidade sira,” nia konta.

Entretantu, durasaun kursu durante semana rua, aleinde nee sei iha tan planu ba membru F-FDTL sira seluk, bainhira remata sei aplika ba iha fatin-fatin, no kursu daudaun nee kompostu husi mane deit, mai husi ofisiais maijor, husi Sentru Instrusaun Nikolau Loubato Metinaru rasik.

Iha biban nee, Komandante Interino do Sentru de operasaun, de Apoio a Paz, Tenente Marcelo Mendonca de Araujo haktuir, Kompresensivu Protesaun ba Sivil, hanesan atividade formasaun ida neebe ONU dezenvolve hodi hasae kapasidade ba ema neebe foti desizaun militar ONU nian, konaba oinsa atu proteje ema sivil sira iha nivel taktiku.

Nia dehan, Protesaun Sivil nudar papel prinsipal husi komponente militar iha UNMISS (Sudaun Sul) neebe daudaun nee halao hela UNMO F-FDTL nian, nomos iha misaun boot ba manutensaun pas multi-dimensional neebe hetan iha Mali, Republika Afrika Sentral no Republika Demokratika Kongo. Iha misaun sivíl sira ne’e hotu dala barak hetan ameasa no dala barak vítima violensia seksual neebe relasiona ho konflitu, tortura no omisidiu.

“Ami nakonu ho ADF, POTC, no MPC liuhusi DCP-TL neebe, suporta F-FDTL CTOAP hodi halo kursu nee halao ba dahuluk iha Timor-Leste. Sei iha mos responsabilidade seluk ba CTOAP atu organiza kursu CPOC iha Timor-Leste iha futuru,” dehan nia liu husi diskursu.

Nia mos apela ba partisipante sira neebe hein atu serbi iha misaun manutensaun Paz ONU nian iha futuru, iha mundu tomak, kursu nee iha informasaun importante tebes atu hasae ita nia kapasidade nudar foti desizaun konaba oinsa atu proteje ema sivil sira iha nivel taktiku, favor ida uza tempu no fatin neebe folin boot, hodi halo buat hotu neebe diak ba imi hotu, no hein katak imi sei hetan buat barak husi dalan nee.

(efi)

LEAVE A REPLY

Please enter your comment!
Please enter your name here