Membru F-FDTL Nain 8 Remata Formasaun Komputador

DILI, STLNEWS.co Membru FALINTIL – Forsa Timor-Leste (F-FDTL) nain 8 husi Komponente Naval, kompostu husi mane nain 6 feto nain 2 remata ona formasaun kursu komputador.

Bainhira remata atribui sertifikadu ba membru sira, Segundu Komandante Komponente Naval, Kapitaun Fragata Guido Guteres da Silva hatoo parabens no agradese ba membru sira neebe ho boavontade durante fulan ida sira aprende kursu komputados iha nee.

“Importante tebes atu kapasita konhesimentu individual iha servisu admnistrasaun sira, nunee fasil ba imi atu halo servisu,” dehan nia ba Fuzileirus sira liu husi diskursu iha Komponente Naval Hera, Dili, Sesta nee (26/05/2023).

Nia dehan, ho esperansa ba kursu ida nee, durante fulan ida maibe nia benefisiu boot tebes, tanba kursu ida nee iha mundu global agora hakarak ka lakohi ida nee mak sai hanesan hahan loron-loron nian.

“Nee duni ho kursu ida nee, hau hakarak agradese ba Programa Koperasaun Defeza (DCP) Australia, liu husi nia DCP neebe mak suporta ba F-FDTL no Komponente Naval, ageadese wain ba ajudus neebe iha,” dehan nia.

Nia hateten, formasaun kursu komputador nee laos too deit iha nee, maibe sei kursu oin-noin neebe mak hetan ajudus husi DCP Australia, tanba nee sira agradese tebes.

“Hau husu parabens ba estudante sira neebe mak simu ona sira nia sertifikadu, hau hakarak agradese mos ba ita nia adidu Australia neebe mak durante nee ajuda tebes, nomos mestre neebe ho pasiensia tomak hodi fo formasaun ba estudante sira ho diak durante fulan ida,” hakotu nia.

Iha biban nee, Adjuntu Adidu Defeza Kapitaun de Fragata Birgitte Jensen, senti haksolok tebes ba partisipante sira neebe partisipa hodi tuir formasaun refere ho diak durante fulan ida nia laran.

“Imi hotu servisu makaas tebes, hau espera imi sei uza buat neebe imi hatene ona, parabens dala ida tan,” dehan nia.

Nia mos agradese tebes ba membru F-FDTL nain 8 neebe termina ona sira nia kursu, tanba nee nia husu ba sira atu kontinua halao servisu neebe makaas.

Nunee mos treinador Filipe Ximenes agradese tebes ba estudante sira neebe mak durante fulan ida tuir ona formasaun kursu ba Komputador nian, husi grau-1 baziku nomos nivel-2 nian ho diak.

Maski balun hetan difikuldade iha nivel primeiru, maibe sira nafatin kuriozu hakarak hatene, tanba nee nia mos tenta ho pasiensia hodi fahe, tenta mos komprende sira nia prosesu aprendizajen nian.

“Hau koko atu hamutuk nafatin ho sira, hodi fahe nafatin saida mak hau iha ba sira, nunee maun s ira bele dezenvolve rasik, hodi aplika iha maun sira nia servisu loron-loron nian,” dehan nia.

Nia hateten, liu husi formasaun hirak nee, bainhira estudante sira nee fila fali ba sira nia unidade idak-idak, sira mos bele aplika saida mak sira hetan tiha ona husi kursu nee.

(efi)

LEAVE A REPLY

Please enter your comment!
Please enter your name here