Membru F-FDTL & PNTL Kompromete La Envolve GAM

DILI, STLNEWS.co – Membru FALINTIL – Forsa Defeza Timor Leste (F-FDTL) no Polisia Nasional Timor Leste (PNTL) halo juramentu hodi kompromete la envolve grupu arte marsiais (GAM) no arte rituais, hodi defende, servi povu no nasaun.

Serimonia juramentu nee prezide husi Primeiru Ministru Kay Rala Xanana Gusmão, akompanha husi Komandante Jeral PNTL, Komisariu Polisia Henrique da Costa no Xefe Estadu Maior F-FDTL, Tenente Jeneral Falur Rate Laek.

Serimonia hahu ho revista parada husi Primeiru Ministru, hafoin kontinua ho estandarte nasional tama iha kampu kontinua kedas kanta Hinu Nasional no minutu silensiu. Hafoin juramentu kontinua kedas ho asina formulariu juramentu, serimonia nee hetan partisipasaun husi Ministru Defeza, Pedro Klamar Fuik, Ministru Interior, Francisco Guterres, Xefi Estadu Maior Jeneral Das F-FDTL, Tenente Jeneral, Falur Rate Laek, Komandante Jeral PNTL, Komisariu Jeral Polisia Henrique da Costa, komandante sira husi instituisaun F-FDTL no PNTL, no Komandante parada ba serimonia nee Damiao da Silva Correia, Superintendente Komandante UEP, hafoin prezide juramentu, Primeiru Ministru Kay Rala Xanana Gusmao ho tanis husu membru husi instituisaun rua nee, ho konfiansa saida mak sira temi iha nee, sei halao hodi hamutuk servi rai no povu ida nee. Membru F-FDTL neebe reprezenta halo juramentu nee husi Polosia Militar (PM) 48, Quartel Jeneral 44, Unidade Espesial 39.

Hafoin halo juramentu, membru sira asina kompromisu de onra, no membru PNTL nain 2 entrega atributu arte marsiais ba Primeiru Ministru.

“Arte marsiais oi-oin neebe barak ona iha TL, ba jura ba bandeira merah puti hodi fila mai Timor, kria kriminalidade, oho malu, estraga valor familia nian, no valores morais sarani nian, no hodi mos haree katak, iha PNTL no F-FDTL rasik, husi komandante too ajente, ami balun tama iha arte marsiais, tuir juramentu ba bandeira merah puti, neebe ami tenki halao hodi halakon tiha ami nian konsiensia, no tau ba kotuk ami nia knar sagradu atu rezolve pas no estabilidade iha komunidade sira nian leet, liu-liu iha juventude sira nian leet mak ami mai iha nee hodi jura ba Maromak, ba rai lulik ida nee, ba eroi no matires sira, ba beiala sira, ba Estadu RDTL no ba povu Timor tomak katak, ami hakotu ho juramentu ida nee, lasu no relasaun hotu-hotu, ho grupu arte marsiais, iha neebe ami idak-idak halo parte,” dehan Primeiru Ministru (PM), Kay Rala Xanana Gusmao neebe prezide serimonia juramentu husi membru F-FDTL no PNTL iha Palasiu Governu, Kinta nee (07/12/2023).

Nudar ajente ba PNTL no F-FDTL kompromete aan atu servi deit rai lulik ida nee, hodi defende deit intrese povu TL nian, ami jura atu partisipa ho neon ho laran tomak ba establidade nasional, no sei esforsa aan atu lori joven Timor oan sira neebe pertensia ba grupu arte marsiais oi-oin, atu husik kedas grupu sira nee, tanba hatudu ona katak, juramentu nee halo ho bandeira merah puti, halakon tiha kedas, konsiensia nasionalista no konsiensia ba domin no dame, nudar valores husi kedas beiala sira, nudar mos baze fundamental ba dezenvolvimentu nasaun nee, kompromete aan katak, karik sira idak-idak la hatudu iha pratika katak, sira husik ona GAM ida-idak, no halo tuir nafatin hahalok aat no foer husi arte marsiais sira, ami idak-idak prontu atu simu desizaun governu nian atu sai husi instituisaun rua estadu nian, PNTL ka F-FDTL, juramentu ida nee halo ho konsiensia tomak, konaba nesesidade atu hari isosiedade ida neebe bele respeita no hakuak malu, hodi kria ambiente pas no estabilidade iha rai doben TL, nudar kondisaun fundamental ba dezenvolvimentu nasional, hahu husi komunidade iha aldeia no suku, postu administrativu ka munisipiu.

Kontinua ba pajina 2

LEAVE A REPLY

Please enter your comment!
Please enter your name here