DILI, STLNEWS.co – Membru Polisia Militar (PM) husi FALINTIL-Forsa Defeza Timor Leste (F-FDTL) nain 36 partisipa formasaun Maubere VII, liu husi kooperasaun tekniku militar ho Republika Federativa Brazil.
Liu husi diskursu Xefi Estadu Maior Jeral F-FDTL, Tenente Jeneral Domingos Raul Falur Rate Laek hatoo parabens ba konvidadu no partisipante sira hotu iha formasaun militar F-FDTL nian, liu-liu PM, turma Maubere VII 2023, liu husi kooperasaun tekniku militar ho Republika Federativa Brazil nian, misaun Maubere fo apoiu ba PM hodi konsolida doutrina empregu no hadia prosesu formasaun ba membru sira, nunee mos habelar kapasidade empregu no kombate F-FDTL nian iha atividade sira neebe relasiona ho defeza.
“Durante tinan hirak nee, ita bele konsidera servisu neebe militar husi rai belun Brazil hamutuk ho ita diak tebes,” tenik nia liu husi diskursu iha Salaun Polisia Militar, Quintal Boot, Kinta (14/09/2023).
Nia dehan, aleinde konesimentu neebe fahe ona, fo mos dalan ba formasaun ba militar sira neebe iha abilidade teknika no profisional neebe aas, atitude, dedikasaun no komitmentu husi instrutor sira lidera ho rigor, profisionalizmu no kompetensia profisional, ajuda kria kultura organizasaun ida neebe halo Unidade Polisia Militar hamrik firme iha F-FDTL nia laran, sai mos ezemplu, sezijente no hatudu nivel profisionalizmu neebe aas atu ema hotu fo respeitu.
Nia hatete, tanba nee durante formasaun imi hotu presiza aprende atu adapta hodi implementa tuir padraun sosiedade Timor nian.
“Militares sira husi klase Maubere VII neebe kompostu husi 36, hau fiar katak imi sei hetan formasaun profisional neebe aas no rigorozu, ho asuntu sira neebe fahe entre atividade teorika no pratika, neebe foka liu ba seguransa publiku no adapta ba ambiente militar,” katak nia.
Nia informa, hafoin treinamentu halao husi instrutor kualifikadu sira iha area espesifiku, atividade no modalidade polisia nian, fiar katak imi sei sai profisional foun iha Unidade Polisia Militar neebe bele atua iha senariu oin oin.
Iha fatin hanesan, Komandante Unidade Polisia Militar,Tenente Coronel,Abel da Costa Xavier “Niki” afrma, atu fo atensaun ba soldadu sira hotu iha nain 36, imi nain hira hanesan mos instrusaun neebe imi sai husi faze ida rekrutamentu agora ba iha faze ida bolu profisionalizmu ba iha Polisia Militar.
“Ida nee laos buat fasil, maibe ida nee prosesu ida neebe obstaklu boot neebe mak imi sei hasoru, iha durante fulan tolu nia laran mak imi labele, imi nain hira tenkeser bele fila ba iha komponente seluk, ida nee regras ida neebe mak lao dadauk iha Maubere I ohin too ona Maubere VII,” dehan nia.
Tanba nee husu ba membru nain hira neebe mak tuir formasaun hotu hotu tenke konsentra pasiensia, kuda espiritu iha kakutak atu ajuda no apoiu malu, ida nee imporatante.
(mar)
