Membru PNTL Sarjentu Xefi Polisia, Fernando Remata Jornada Moris

DILI, STLNEWS.co – Membru Polisia Nasional Timor-Leste (PNTL), Sarjentu Xefi Polisia Fernando Filomino Saldanha remata peregrinasaun iha mundu, tanba moras fuan.

Tuir oan husi matebian, Jeronimo Vitorino Saldanha katak, pai nudar membru polisia ativu, maski iha VIII Governu hapara tanba idade reformadu, maibe iha politik IX Governu bolu fali sira ba ativu servisu, tanba nee nia ativu servisu hela too hakotu iis.

“Maibe ami nudar oan mos la satifas ho atitude PNTL nian, tanba pai mate la hanesan membru polisia, maibe hanesan ema sivil, tanba pai mate laiha komandante ida mak mosu ba iha neeba, hodi halo seguransa nudar membru PNTL ida”, lamenta Jeronimo Vitorino Saldanha ba STL, Segunda (12/02/2024) iha semiteriu Bekusi.

Nia lamenta, membru arte marsiais ida mate polisia tun halo seguransa runggu rangga, maibe pai nudar membru polisia ida mos mate laiha polisia ruma ba, too lori ba misa atu halo funebre iha akademik mak polisia sira foin mosu ba, ida nee lamentavel tebes.

Tuir nia, tanba destinu neebe Maromak termina ona ba sira nia aman nia jornada moris ida nee hanesan nakukun neebe hafalun sira ho moruk boot ida, sira la prontu simu realidade nee, maibe nee dalan neebe ema hotu sei la ses. Maibe sira husu nafatin ba Komando PNTL atu halo atendimentu diak ba membru sira bainhira lakon vida.

Entretantu, reprezentante Komandante Jeral PNTL, Superitendente Polisia Emilio dos Santos hatoo sentidu kondolénsia ba familia boot, espesialmente ba faluk ho oan kiak neebe matebian Fernando husik hela.

Matebian servisu iha Instituisaun PNTL durante tinan 20 resin, ho servisu lubun neebe mak nia halo nee mak kontribuisaun ba estadu, povu no nasaun ida nee.

“Ita hatene katak tuir kultura PNTL nian, bainhira membru ida hetan susar, normalmente ita hasai despaisu hodi promove nia deviza anterior ba deviza foun”, katak nia.

Neebe deviza uluk tempu Indonezia katak Pankat Anumerta, neebe distribui ba membru neebe hetan susar, tanba nee iha despaisu katak, ohin ba oin promove nia ho Postu Sarjentu husi Ajente Xefi diviza atul neebe nia tau. Despaisu nee mos entrega ba familia hodi bele trata dokumentus sira neebe liga ba administrativu, liu-liu liga ba pensaun nian.

“Durante nee partisipasaun PNTL nia ladun masimu, maibe ida nee mak kbiit no kapasidade instituisaun nian, maibe ami fiar katak partisipasaun no kolaborasaun entre PNTL ho familia nian mak ita halo ona matebian iha nia toba ikus”, hatete Emilio.

Tuir nia, ba despezas ba familia, nee hanesan baibain, membru ida kona susar, instituisaun fo US$ 3 mil, hodi sosa kaisaun no nesesidade neebe mak presiza hodi haloot matebian.

Iha parte seluk, liu husi Omilia Amu Kapelaun PNTL, Abril hatete, tristeza ida mosu, tanba maluk Fernando Saldanha neebe iha semana kotuk sei hamutuk ho ita no halo kontaktu malu, maibe agora ba oin labele ona atu hamutuk i kontaktu hanesan baibain, tanba Aman Maromak bolu ona nia sai husi mundu.

“Ohin ita laran triste no taridu, maibe buat ida mate no moris laos kompetensia ita nian, tanba nee kompetensia Maromak nian, bainhira moris Maromak sei la husu ita atu moris iha neebe, no mate mos hanesan, Maromak sei la husu ba ita atu mate iha neebe”, katak Amu Kapelaun PNTL, Abril, iha misa requem ba Matebian Fernando Saldanha, iha Akademik Komoro.

Padre nee hatete, bainhira lakon prezensa husi familia ida, ba deit rai liur mos sei tristi, sa tan hakotu iis, ida nee la hamutuk ona ho familia sira hanesan baibain i laiha ona kontaktu malu hanesan baibain, fizikamente, maibe maski mate ona, nee espiritualmente nafatin iha kontaktu, importante halo orasaun akompanha nafatin matebian.

(gui)

LEAVE A REPLY

Please enter your comment!
Please enter your name here