DILI, STLNEWS.co – Prioridade 100 dias Ministeriu Interior (MI) defini area prinsipal 4, inklui hadia infraestrutura ba Polisia Nasional Timor-Leste (PNTL), no hamoris fila fali polisia komunitaria, kria lei reforma migrasaun, no implementasaun rigorozu konaba profisionalizmu polisia nian.
“Area prinsipal 4 nee ita presiza hadia lakunas balun neebe mak durante nee fo impaktu ba dezenvolvimentu seguransa iha rai laran no konflitu akontese iha fati-fatin,” hatete Ministru Interior (MI), Fransisco Guterres ba jornalista sira iha Portu Dili, Kolmera, Kinta (13/07/2023).
Nia esplika, tenki hadia infraestrutura ba Polisia Nasional Timor-Leste (PNTL), hahu husi komandu jeral, munisipiu, no eskuadra, nunee mos unidade sira.
Tanba nee nia dehan, iha 100 dias servisu neebe mak todan tebes hodi defini saida-saida mak presiza halo iha tinan 5 nia laran nee.
Nia esplika, iha area hirak refere atu defini ameasa mai Timor nee mak saida, nunee mos bele dezenvolve PNTL hodi responde ba ameasa sira.
“Ameasa iha Timor-Leste nee invazaun laiha, maibe violensia mak akontese iha fatin-fatin oho malu, baku malu, ita defini nunee ita bele trasa planu no tau iha ita nia seguransa hodi responde ba situasaun neebe mak ita enfrenta,” nia informa.
Nia hatutan, fator seguransa nee importante ba dezenvolvimentu iha Timor-Leste, atu nunee bele loke dalan ba ema mai investe, nunee bele dezenvolve ekonomia iha rai laran.
Iha fatin hanesan, Diretor Fundasaun Mahein (FM), Abel Amaral esplika, planu 100 dias nee mak sei determina sira nia programa servisu durante tinan 5, tanba nee tenki difini lo-loos problema sira neebe mak durante nee instituisaun hasoru, nunee bele rezolve no fo seguransa diak ba nasaun Timor-Leste.
“Ita espera katak, area hirak neebe sira defini nee identifikadu duni. Ita husu atu labele haluhan halo rekrutamentu ba membru polisia foun hodi substitui fali sira neebe mak reforma ona,” nia koalia.
Nia fiar katak IX Governu bele halo dezenvolvimentu diak liu tan ba iha Instituisaun PNTL liu husi hadia profisionalizmu, kria kondisaun hodi bele asegura povu no nasaun ho diak tuir ordem no lei.
(jen)
