DILI, STLNEWS.co – Polisia Nasional Timor Leste (PNTL) liu husi Unidade Polisia Tranzitu Rodaviariu husu ba motorista trasporte publiku, tenki utiliza uniforme hodi tula pasajeirus.
Haktuir Komandante Tranzitu Seguransa Rodaviaria Nasional Superintendente Asistente, Luis da Costa ba jornalista sira iha Kamando Jeral PNTL, Kaikoli, Dili, Tersa (01/08/2023).
Nia dehan, motorista transporte publiku hanesan taxi, mikrolet no bis kota sira tenki obrigatoriu utiliza uniforme hodi tula pasajeirus, tanba uniforme ba motorista transporte publiku sira nee iha no hatur ona iha dekretu lei, tanba nee obrigatoriu tenki uza.
“Motorista sira obrigatoriu tenki uza uniforme hodi halo atividade tula pasajeirus iha Dili laran, nunee mos munisipiu sira, hodi hatudu sira nia profisionalizmu,” nia tenik.
Tanba nee nia dehan, polisia sei halo kontrolu neebe rigor ba motorista transporte publiku sira, bainhira la utiliza uniforme mak sei aplika multa infrasaun tuir lei kodigu estrada nain.
Nia esplika, ba motorista transporte publiku sira neebe la kumpri no la utiliza uniforme bainhira halo movimentu tula pasajerius mak polisia sei aplika multa. No daudaun nee Komando Jeral orienta ona ekipa tranzitu hodi halo operasaun espesifiku ba utilizasaun fardamentu ba motorista sira.
Iha fatin ketak, Kondutor Taxi Armindo Lopes esplika, PNTL husu ba motorista trasporte publiku tenki utiliza uniforme hodi tula pasajeirus, ida nee regras neebe loos, maibe uniforme balun nakles ona no balun lakon ona nee atu uza oinsa.
“Ita hakarak atu uza iniforme, maibe ami nia farda sira nee balun lakon ona, no balun nakles ona nee ita atu uza saida fali, tanba nee husu ba governu sei bele cetak tan uniforme foun, atu nunee ami bele uza,” nia deklara.
Nunee mos Kondutor Mikorlet 010, Albino da Costa dehan, atu uza deit uniforme mak tula pasajeirus nee diak, maibe uniforme nee klur nakles ona atu uza oinsa, tanba sira mos tenki hanoin ida nee mak foin foti asaun.
“Hau nia uniforme nee nakles ona, agora suku fali iha kotuk laran mak foin hatais fali, tanba nee sei bele fahe fali uniforme foun, atu nunee ami uza loron-loron, ami mos hakarak uza uniforme mak hodi halao ami nia atividade,” nia afirma.
(jen)
