NGO Belun Ho PNTL Disemina Informasaun

DILI, STLNEWS.co – Organizasaun Non Governamental Belun hamutuk ho Polisia Nasional Timor Leste (PNTL) disemina informasaun ba publiku konaba hametin konhesimentu no kapasidade komunidade hodi prevene konflitu.

Tuir Diretor NGO Belun, Luis da Costa Ximenes katak, NGO Belun hamutuk ho parseiru sira implementa atividades disemina informasaun ba publiku relasiona harii dame no prevene konflitu iha komunidade.

“Belun hamutuk ho nia parseiru sira no mos autoridade lokal sira no partisipante joven feto no mane hodi realiza atividades ida nee,” dehan nia ba jornalista sira iha Postu Administrativu Vera Cruz, Dili, Segunda (04/12/2023).

Nia dehan, agora daudaun kontinuasaun husi disemina informasaun ba iha lei arte marsiais hamutuk ho Belun nia parseiru sira inklui parte KRAM nian mos agora halo hela faze sosializasaun no avalia konaba movimentu grupu arte marsiais no mos disemina lei arte marsiais.

Nia akresenta, husi parte belun kontinua atividades no involve mos lideransa arte marsias no arte rituais atu oinsa mak aumenta abilidade no konhesimentu konaba lei arte marsiais, nunee sira bele hatutan ba iha sira nia membru.

Iha fatin hanesan, Juventude Jose Pereia hatete, disemina informasaun konaba lei sira nee importante.

“Informasaun neebe mak ami hetan, hanesan juventude ami sei hatutan nafatin informasaun sira nee ba ami nia kolega sira no ami nia komunidade sira neebe mak hela besik ,” katak nia.

(mar)

LEAVE A REPLY

Please enter your comment!
Please enter your name here