DILI, STLNEWS.co – Membru Polisia Nasional Timor Leste (PNTL) reformadu nain 158 neebe governu reativa fali-fali hodi halao servisu, maibe kolokasaun no nomeasaun nee kompetensia Komandante Jeral PNTL, Komisariu Polisia Henrique da Costa ninia.
Kestaun nee haktuir husi Segundo Komandante Jeral PNTL, Komisariu Polisia Pedro Belo ba jornalista sira iha salaun Komando Jeral PNTL Dili, Kuarta (11/10/2023).
“Ita hotu iha hanoin katak, iha kolokasaun ho mos nomeasaun nee kompetensia Komandante Jeral PNTL nian, atu koloka iha fatin neebe deit,” hatete Segundo Komandante Jeral PNTL nee.
Nia esplika, maibe importante mak membru PNTL reformadu nain 158 nee reativa fali ona, para atu haree fila-fali saida mak rezoluzasun hakerek iha neeba.
“Ita halo tuir desizaun governu nian, tanba buat ida nomeasaun no kolokasaun nee kompetensia Komandante Jeral PNTL, Komisariu Polisia Henrique da Costa ninia, hau labele koalia too iha neeba, tanba ita hatene katak, atu halo nomeasaun nee buat fiar ida neebe Komandante Jeral PNTL atu fo ba nia staf ida para halao nia servisu,” nia tenik.
Nia informa, importante sira mai ona servisu, nunee sira mos halao fali funsaun hanesan membru PNTL.
Iha fatin ketak, Komandante PNTL Munisipiu Dili, Superientendente Xefe Polisia Orlando Gomes informa, Komando PNTL Munisipiu Dili too agora seidauk simu membru PNTL reformadu sira neebe ativa fali sira nia servisu hanesan membru PNTL, sira seidauk mai aprezenta aan iha Komando PNTL Munisipiu Dili.
“Sira nain hira nee too agora seidauk hasoru hau, maibe tuir hau hatene katak, iha ona orden para sira reativa fila-fali, mai hamutuk para hodi kontinua servisu, sira kuandu mai iha nee ita koopera malu para servisu nafatin hanesan baibain,” nia informa.
Nia deklara, sira seidauk mai aprezenta iha Komando PNTL Munisipiu Dili, maibe iha fatin balun sira aprezenta an ona.
(jen)
