DILI, STLNEWS.co – Polísia Nasionál Timor-Leste (PNTL) liu husi Servisu Informasaun Polísia (SIP) Nasional halo vizilansia hodi asegura ona joven mane nain 4 neebe envolve krimi jeral ba kazu halo asaltu iha Sesta kalan, tanba tuda vitima sira iha area Amular, Aldeia Bekusi Kraik, Suku Bekora, Postu Administrativu Cristo-Rei, Munisipiu Dili.
Liu husi komunikadu husi Media Interior Sabadu kalan (22/07/2023) hatete, suspeitu nain 4 nee hela hotu iha area Amular, Suku Bekora no sira nia identidade mak hanesan GdC tinan 19, nudar estudante universitariu no autor prinsipal lori fatuk tuda vitima iha motor leten, FsB alias M tinan 18, estudante eskola sekundaria, ERMS tinan 19, no SdS tinan 19, Estudante Universitariu. Oras nee daudaun vitima ida neebe suspeitu sira tuda monu sai husi motor leten seidauk bele fo deklarasaun, tanba kondisaun grave no sei halo hela tratamentu saude, enkuantu vitima nain rua seluk neebe la kona pankada fatuk mak ho naran Elizio Antonio Silva da Costa, tinan 19, neebe lori motor hela iha Aldeia Bekusi Sentru no Higinio da Silva tinan 23, neebe tur iha motor kotuk hela iha Aldeia Bekusi Sentru. Hafoin asegura suspeitu nain 4 Xefi Ekipa SIPN Aranha Leste, entrega ona suspeitu sira ba Eskuadra PNTL Cristo Rei hodi halo prosesu investigasaun, no detein durante 72h tuir lei neebe iha, antes submete ba tribunal hodi tuir porsesu julgamentu.
(eme)
