PNTL Buka Tuir Autor Espalha Video Motor Soke Malu

DILI, STLNEWS.co – Relasiona ho espalha video asidente motor soke malu iha nasaun Indonezia, neebe autor balun hatama iha media sosial dehan akontese iha Timor-Leste. Ida nee halo komunidade balun paniku, tanba nee Polisia Nasional Timor-Leste (PNTL) liu husi Komando PNTL Munisipiu Dili sei buka tuir autor neebe espalha video hodi prosesu.

“Ba video neebe viral iha media sosial, ida nee ita Timor oan balun neebe laiha responsabilidade la hadomi nia rain no la hadomi nia seguransa hodi espalha video nee iha media sosial, dehan akontese iha Timor, neebe halo komunidade balun trauma no tauk, ho ida nee parte PNTL Munisipiu Dili sei buka tuir Autor nee hodi bele prosesu no bele responsablidade ba nia hahalok nee,” hatete Orlando Gomes ba jornalista iha nia knaar fatin Komando PNTL Munisipiu Dili, Kinta (01/02/2024).

Komandante nee esplika, autor nee hanesan ema neebe laiha responsablidade no provoka situasaun seguransa iha rai laran, tanba nee parte PNTL sei buka tuir autor nee.

“Autor neebe espalha video nee hanesan provoka situasaun no halo parte seguransa sira mos tenki preokupa buka tuir fatin akontesimentu hodi bele identifika tebes ou lae, tanba Komando Munisipiu Dili sempre halo swiping iha fatin hotu, no sempre halo cek point iha tempu kalan hodi evita asidente no akontesimentu seluk neebe ema sempre fo sai iha publiku,” nia tenik.

Nia informa, akontesimentu neebe mak akontese motor soke malu nee, akontese iha ema halai motor ilegal, neebe ema bahasa dehan balap rai liur, nee akonrese iha nasaun seluk, laos akontese iha Timor, tanba nee husu ba iha komumidade sira atu labele fiar video neebe sidadaun Timor oan balun hatama iha media sosial, dehan akontese iha Timor.

(jen)

LEAVE A REPLY

Please enter your comment!
Please enter your name here