DILI, STLNEWS.co – Polisia Nasional Timor Leste (PNTL) konsege detein suspeitu nain 5 neebe deskonfia envolve iha kazu konfontu iha area Manumeta Raihun, Aldeia Mate Moris, Suku Vila Verde, Postu Administrativu Vera Cruz, Munisipiu Dili.
“Ba iha konfrontu nee rasik ita konsege detein ema nain 5, ida ita halo deit prosesu identifikasaun ba nian no iha nain 4 mak ita detein ona iha sela Komando PNTL Munisipiu Dili, submete ba oras 72, hodi submete ba prosesu tuir mai,” hatete Komandante PNTL Munisipiu Dili, Superientendente Xefi Polisia Orlando Gomes ba jornalista sira iha Sede Suku Vila Verde, Segunda (21/08/2023).
Nia dehan, kazu nee akontese iha Domingu (20/8/2023), mosu konfrontu ida iha area Manumeta Rai-hun Aldeia Mate Moris, tanba kauza husi membru Grupu Arte Marsial no Persaudaraan Setia Hati Terrate (PSHT) no Grupu Arte Ritual 77.
“Husi kazu deskonfia nee katak, ita nia komunidade sira iha area Manumeta Raihun hetan ataka (seran) husi iha Grupu Arte Ritual 77, no husi fatin seluk mak mai halo asaun tuda no baku ita nia joven iha area refere, nunee mosu konfrontu boot too taa joven ida iha Manumeta Raihun no agora daudaun vitima halo hela tratamentu iha HNGV,” nia hatete.
Nia tenik, husi konfrontu nee mos rezulta komunidade nia uma ida hetan estragus, tanba hetan tuda iha konfrontu nee. No komunidade sira iha Manumeta Raihun senti la seguru too balun evakua horiseik kalan mai iha tiha Sede Suku Vila Verde.
Ho nunee, parte Komando Munisipiu Dili neebe hetan tulun husi Unidade Espesial Polisia (UEP) Batallão Orden Publiku (BOP) halo kedan atuasaun iha area Manumeta Raihun too situasaun hetan kondusivu.
Iha fatin hanesan, vitima Julia da Gama Conceicão esplika, nudar vitima ba konfrontu neebe akontese iha Manumeta Raihun nee, nia uma mak hetan estragus, hanesan odataman, janela, nomos sasan sira seluk.
“Problema nee hahu akontese dezde iha loron 13 fulan Agostu, no kontinua mak too mai horikalan nee sai tiha konfrontu boot nee,” nia informa.
Nia esplika, ema neebe envolve iha konfrontu nee laos mai husi joven sira hela iha area Manumeta Raihun, maibe joven sira neebe mai husi fatin seluk, depois sira mai halibur malu iha Manumeta Raihun halo provokasaun too mosu konfrontu.
Nia dehan, ho konfrontu nee nia ho familia evakua kedan ba Bekora no agora sei hela iha Bekora, tanba tauk ho konfrontu nee. Tanba nee husu ba parte PNTL atu kontinua kontrola area konfrontu nee, atu kontrola situasaun nee hodi seguru fila fali, tanba komunidade sira senti paniku no tauk.
Iha fatin hanesan, Xefi Aldeia Mate Moris, Verônica de Rosário Câmara da Silva, rekonhese joven sira neebe envolve kazu konfrontu iha area Manu Meta Raihun, Aldeia Mate Moris nee laos husi Aldeia Mate Moris nia ema sira, maibe husi fatin seluk mak mai halo problema iha nee.
“Horikalan polisia sira kaer suspeitu sira nee, no aprezenta mai hau la konese joven sira nee,” nia afirma.
(jen)
