DILI, STLNEWS.co – Polisia Nasional Timor Leste (PNTL) liu husi ekipa konjunta neebe husi Servisu Informasaun Polisia (SIP), Servisu Nasional Intelejensia (SIN), Unidade FALINTIL, no Departementu Investigasaun Kriminal (DIP) hamutuk ho PNTL Eskudra Dom Aleixo, detein suspeitu nain 7 neebe produz bomba molotov, hodi prepara atu halo asaun hasoru membru Persaudaraan Setia Hati Terate (PSHT), neebe halo atividade graduasaun iha Tibar.
Lia hirak nee hatoo husi Xefi Departementu Investigasaun Kriminal (DIK) Nasional, Superientendente Polisia João Belo dos Reis ba jornalista sira iha Komando Jeral PNTL, Kaikoli, Dili, Tersa nee (15/08/2023).
Nia dehan, bainhira ekipa konjunta simu informasaun husi fontes balun iha area Maslidun Tasi-Tolu, Suku Komoro, Postu Administrativu Dom Aleixo, katak joven balun iha area refere halibur hela sasan atu produz bomba molotov, hodi ataka membru membru PSHT neebe halo hela atividade graduasaun iha Tibar.
“Ita nia ekipa konjunta halo detensaun fraglante delitu ba suspeitu nain 7 neebe produz Bomba Molotov,” nia hatete.
Nia esplika, planu sira nee la konsege, tanba parte autoridade seguransa liu husi ekipa konjunta halo kedan intervensaun rapida hodi lokaliza joven hirak nee nian atividade, no iha Segunda (14/8/2023) iha oras 20:00 no ekipa konjunta halo kedan detensaun ba joven sira nee ho fráglante delitu.
“Bainhira ekipa konjunta tun ba terenu detekta duni katak, joven sira nee hahu produz bomba molotov, ho evidensia sira neebe joven sira nee prepara mak hanesan butir kiik hamutuk 25 pregu 10 sentimu, gazolina masa ida, katana ida, no sumbu fungaun neebe sira prepara ona atu hatama butir sira nee,” nia informa.
Nia koalia, nunee ekipa rekolla kedan evidensia sira nee iha terenu, hodi lori sai hanesan aktus ba investigasaun no suspeitu sira neebe mak PNTL detein mak ho inisial, AC, FS, GMA, PALAS, EAS, RFM no MCAT.
“Suspeitu sira nee ita lori kedan mai iha Departementu Investigasaun Kriminál Nasional hodi prosesu identifikasaun. Iha Prosesu identifikasaun nee ita konsege detein suspeitu nain lima, enkuantu nain rua seluk horikan kedan ita husik fila -fali tanba ho ida menoridade,” nia deklara.
Nia hatutan, suspeitu nain lima nee agora dadaun detein ona iha sela Komandu PNTL Munisipiu Díli no ba suspeitu ho minoridade seluk nian prosesu sei kontinua.
Iha fatin ketak membru PSHT Joao da Costa esplika, iha konfrontu nee laiha ema ida maka kanek todan ou mate, maibe iha membru PSHT feto ida nain ida hetan kanek iha parte ulun no agora tratamentu iha HNGV.
“Iha Raikotu durante ami halo atuasaun no prevene ba krime no konfrontu neebe sira halo laiha ema ida kanek todan ou lakon vida, maibe ita nian PNTL nia karta maka hetan estragus,” nia informa.
Nunee mos Diretor Ezekutivu Fundasaun Mahein (FM) Nelson Belo esplika, akontesementu beibeik ona antes nee iha komunikasaun entre Ministeriu sira neebe iha ligasaun konaba trata Arte Marsiais PSHT, sira iha komunikasaun diak loos, too mai graduasaun, maibe akontesementu ida nee kontinua nafatin iha, entaun Dili nee sai paniku fatin neebe mak halo la senti moris seguru iha iha sidade Dili.
“Ita lao la seguru, ita atu ba loja ou ba servisu la seguru, tanba Dili nee sai tiha fali fatin ida neebe hanesan ita moris iha funu boot ida, tanba ita nian tauk nee nivel ida aas loos hanesan,”nia esplika.
Nia informa, PNTL halao nian knar diak, maibe fundasaun Mahein nian prekupasaun maka ida akontesementu bei-beik problama arte marsiais iha Sidade Dili nomos Munisipiu, tanba sira nia mentalidade mak halo hodi hamosu konfrontus.
Nia deklara, problema konaba edukasaun, tanba saida maka ema kuadu trenamentu ema sai ameansa malu, no laiha komprendesaun ida neebe diak, nee tanba provokasan no mosu ona ida nee mak ladiak.
Nia esplika, provoka malu nee ba ona mentalidade kata, hau gradua tenke sai ona membru nee kria ona problema, ou hau mos lakohi sira seluk gradua, entaun mentalidade ida nee hamosu konfiltu. Tanba nee FM nia hanoin, governu uluk no antes nee, haree konflitu sira nee hanesan baibain deit, ida nee inflitrasan ida neebe maka nivel boot too nivel desizaun.
(jen)
