PNTL Detein Suspeitu Nain Hitu Hadau Telefone

DILI, STLNEWS.co – Komandante Polisia Nasional Timor-Leste (PNTL) Munisipiu Díli detein ona suspeitu nain 7 neebe sempre hadau ema nia telefone iha sidade Dili.

Nia dehan, suspeitu sira nee Ekipa Konjuntu Unidade Intelejensia asegura iha fatin la hanesan iha area Dili laran, iha kuarta (26/7/2023) kalan. Suspeitu nain 7 neebe mak Ekipa Konjuta detein ho insial hanesan SMS, VBDG, FCMX, DSCS, YDKS, ZMSX no DFAR.

“Ita hotu-hotu akompanha akontesimentu kazu neebe mak durante nee akontese ema naok sasan iha fatin-fatin, liu-liu kapital Dili, hahu husi loron 1 too 25 Julhu 2023. Ita simu keixa 5 husi ita nia sidadaun sira no ita halo prosesu,” hatete Komandante PNTL Munisipiu Dili, Superientendente Xefi Polisia Orlando Pereira Gomes liu husi Konferensia Imprensa ba jornalista sira iha Komando PNTL, Kaikoli, Dili, kinta (27/07/2023).

Nia tenik, agora daudun PNTL asegura ona ema nain 7 neebe halo asaun naok telefone no suspeitu sira nee submete ona ba prosesu identifikasaun no agora suspeitu sira nee PNTL detein ona iha sela Komando Munisipiu Dili.

Nia informa, suspeitu sira ne’e ekipa unidade intelijénsia ka’er iha fatin la hanesan iha área Díli laran fora fráglante deitu. No susbemete ona ba prosesu investigasaun no asegura ona iha sela Komando PNTL Díli.

“Suspeitu sira nee nudar grupu organizadu neebe konsentra iha Dili, nee mak halo sira nia asaun iha fatin ketak-ketak, maibe liu husi planu no jestaun opersaun neebe Komando PNTL Dili halo no hetan tulun husi servisu intelijénsia sira detekta suspeitu sira nia fatin no konsege asegura ona sira.

“Sira agora ita asegura hodi hein prosesu tuir mai, tanba sira ne’e ita asegura fora fráglante delitu,” nia esplika.

Orlando informa, modus neebe suspeitu sira nee uza mak ho motorizada rua halai besik sidadaun sira neebe ho motor, sira ida tenta halao asaun hodi hadau telemovel neebe tau hela iha motor oin, bainhira sira hadau tiha sasan sira nee, depois mak suspeitu sira nee halai.

Nia informa, evidensia sira neebe suspritu sira uza hodi halo asaun nee Komando PNTL Dili asegura hotu ona, iha motorizada lima ho tipu Scoppy ida no Beat haat. Inklui agora daudaun nee mos PNTL asegura telefone lima neebe suspeitu sira hadau husi komunidade.

“Komando PNTL Díli sei la nonok no sei kontinua intesifika liu tan hodi halo planu operasaun iha tempu kalan liu husi lao ain tama sai bairu risku sira iha Dili laran, atu nunee preve asaun krimi sira hanesan,” nia deklara.

Nia koalia, iha parte unidade intelijénsia kontinua buka tuir hodi indentifika suspeitu sira seluk komete krimi sira hanesan nee, tanba tuir prosesu investigasaun neebe mak Komando PNTL halo ba suspeitu sira nee sei iha tan suspeitu sira seluk neebe envolve kazu hanesan.

Komandante Munisipiu PNTL Munisipiu Dili nee informa, PNTL sei la tolelera asaun neebe mak suspeitu sira halo hodi hatauk komunidade sira, nunee sei intensifika operasaun hodi kontinua halo operasaun prevene aktu krimi sira hanesan nee, kuanddu hetan tan suspeitu balun sei lori hotu sira mai iha Komando Dili, hodi submete ba prosesu.

Iha fatin ketak, Vitima Julia dos Santos esplika, husu ba Polisia Nasional Timor-Leste (PNTL) atu tau antesan ba asuntu naok teen neebe sempre asaltu ema iha dalan no hadaun ema nia sasan hodi halai.

“Ita husu ba parte seguransa atu tau atensaun ba asuntu naok teen neebe asaltu ema iha dalan no hadau ema nia sasan, tanba dala barak ita haree akontese ema hadau ita nia telfone depois halai,” nia informa.

Nia dehan, horiseik kalan tuku 20:00 OTL, fila servisu ema naok teen ho motor liu husi largo, no ema naok teen nain rua lori motor uza ropa metan hotu hadau nia telefone husi bagasi motor.

“Ema naok teen nain 2 lori motor uza ropa metan hotu, hadau hau nia pasta no telemovel, aat liu tan mak sira hadau hotu, depois sira tebe tan hau nia motor hodi monu no rezulta hau nia liman kanek, no hau nia ain mos kanek hotu,” nia informa.

Aleinde nee, Familia Vitima Anabela da Silva informa, ohin iha emerjensia mana ida mos tama uluk ho kazu nebe hanesan, agora akontese mos ba alin feto nee, ema hadau nia telefone ho pasta depois tebe tan alin monu tun ba rai, tanba nee husu ba PNTL tenki buka tuir outor sira neebe gosta naok ema nia sasan.

“Ita haree kazu hanesan nee akontese barak ona no maioria akontese ba maluk feto sira, ita haree iha Dili komesa la seguru, naok teen sira barak no buras ba beibeik, parte seguransa favor boot ida labele nonok deit, haree foti asaun neebe rigorozu ba ema naok teen sira nee,” nia afirma.

(jen)

LEAVE A REPLY

Please enter your comment!
Please enter your name here