DILI, STLNEWS.co – Polisia Nasional Timor Leste (PNTL) realiza enkontru seguransa ho adidu diplomata atase bilaterais nomos parseria internasional, hodi koalia konaba situasaun seguransa iha rai laran.
Enkontru ho adidu seguransa hirak nee realiza iha Salaun Komando Jeral PNTL Kaikoli. Dili, Tersa (27/06/2023).
Liu husi intervista Komandante Operasional i Admnistrasaun Superintendente Xefe Jose Soares hateten, ohin loron 27 Junhu 2023, Komando Jeral PNTL realija enkontru ida ho adidu seguransa neebe mak iha teritoriu Timor Leste, hodi partilha informasaun konaba seguransa ba diplomata sira.
Nia dehan, enkontru ida nee tuir loos sira realiza tiha ona antes kampanha eleitoral, maibe iha tempu neeba ajenda okupadu, tanba sira haree liu ba iha kampanha eleitoral iha teritoriu Timor-Leste, entaun la konsege realiza iha tempu neeba, tanba nee mak foin realiza iha loron ohin.
“Enkontru nee atu ita partilha informasaun ba adidu sira konaba seguransa iha teritoriu Timor laran tomak, nunee sira iha obrigasaun atu hatene konaba sira nia prezensa iha Timor,” dehan nia.
Nia hatutan, sira hasai konvite ba diplomata sira iha Timor, sai nain ba odamatan boot mak Ministeriu Negosiu Estranjeiru, mais ohin loron la marka prezensa, tanba nee ohin iha enkontru ida nee mos sira barak mak apresia konaba enkontru refere.
Tuir nia, balun fo hanoin ba sira atu oinsa mak bele melhora sira nia atendimentu ba publiku, no komentariu hirak nee iha negativu iha mos pozitivu, nebe mak kabe ba iha kompetensia PNTL nian bele responde iha tempu badak, maibe iha balun kabe laos kompetensia PNTL nian, tanba nee sira mos tenki koordena ho diresaun sira seluk, atu oinsa bele fasilita atendimentu ba publiku diak liu tan.
Nia esplika, koalia konaba seguransa iha teritoriu Timor Leste, antes eleisaun, nunee mos eleisaun, iha dadus komparasaun tinan hirak ba kotuk, ho tinan ida nee, iha eleisaun nee nian sira mos aktuliaza konaba estatistiku krimi iha treitoriu Timor laran ba maluk sira, nunee mos estatistiku tranjitu ninian.
“Krimi neebe mak aas iha Timor, ida mak violensia domestika ho asaltas,” hakotu nia.
Tuir nia, iha enkontru nee ema hotu-hotu apresia konaba aprejentasaun ida nee, iha biban nee sira mos rekomenda atu trimestral ou semestral, bele realiza enkontru hanesan nee.
Iha Biban nee, Komandante Unidade Patrulhamentu Fronteira (UPF), Interinu, Superintendente Asistente, Carlos Moniz Maya hateten, sira nafatin haree ba dadus neebe mak ohin komando operasaun aprejenta atividade kontra bandu nee, buras nafatin.
“Neebe ita sei halo nafatin prevensaun ligadu ho ultrapasa linha fronteira ilegal nomos kontra bandu nee nian,” dehan nia.
Nia afirma, sira nafatin buka meius hodi esplika ba komunidade sira neebbe mak hela iha neeba, polisia nee instituisaun estadu nian, fulan fulan estadu selu, entaun tenki orienta sira atu labele simu subornu.
“Tanba ita estadu nia ema, estadu selu ita para halo servisu, entaun subornu nee kontra ona regulamentu disiplinar, kuandu ita detekta iha membru balun neebe mak halo subornu, klaru katak ita sei foti asaun, ita muda sai ou bolu xamada atensaun, ou ida neebe mak grave liu ita rekomenda para loke prosesu disiplinar, neebe mak estabelese tuir regulamentu disiplinar,” dehan nia.
Tuir nia, temporariamente tinan 2 nia laran, sira nia mandatu seidauk rejistu kazu neebe mak ligadu ho subornu, mezmu insidente kiik oan, mais nee konsidera hanesan asidente, depois bele tenta fo xamada atensaun.
(efi)
