DILI, STLNEWS.co – Prezidente Republika Jose Ramos Horta husu Komando Polisia Nasional Timor Leste (PNTL) ho FALINTIL – Forsa Defeza Timor Leste (F-FDTL) atu haree regra disiplinar, relasiona ho membru parte rua nian balun uza arma hakanek sidadaun sira.
Prezidente Republika Jose Ramos Horta hatoo lia hirak nee ba jornalista sira, bainhira remata partisipa Asembleia Nasoens Unidas iha Aeroportu Internasional Nicolao Lobato Komoro, Tersa (26/09/2023).
“Hau hatete iha problema disiplinar iha forsa nia laran ka iha PNTL nia laran, maibe bainhira ita kompara ho situasaun sira seluk iha mundu ou mezmu kompara iha rai laran duni, ita haree insidente sira nee izoladu. Hau kontinua kontenti ke ita nia forsa, ita nia polisia kuaze sempre hatudu disiplina, deves enkuandu falhansu, maibe laos problema boot ida kompara ho rai barak, maibe ba ida nee iha mekanizmu instituisaun sira nia rasik, F-FDTL ho PNTL para haree problema displina,” hatete Horta.
PR hatete, nia hatene Komando PNTL ho F-FDTL sira rigorozu tebes, la tolera problema indisplinar iha forsa nia laran, tanba nee husu kontinua tau atensaun disiplinar iha instituisaun nia laran.
“Hau hatene Komando F-FDTL ho PNTL sira rigorozu, tebes la tolera problema indisplina iha forsa nia laran,” dehan Prezidente Republika.
(eme)
