DILI, STLNEWS.co – Polisia Nasional Timor-Leste (PNTL) liu husi Komando PNTL Munisipiu Dili, orienta joven sira bele halo prezepiu hodi selebra loron santu natal nian, maibe tenki halo dook husi estrada hodi labele kria problema neebe atu mosu.
Nia dehan, iha Dezembru atu tama ba iha natal, joven sira bele halo prezepiu iha bairu-bairu sira, maibe tenki halo dook husi estrada ibun, labele toka muzika, no labele dansa iha prezepiu laran, nunee labele mosu dezentendimentu hodi hamosu problema.
“Hau hanesan Komandante PNTL Munisipiu Dili, hakarak informa deit ba iha juventude sira hotu katak, tama ba iha fulan Dezembru bele halo prezepiu hanesan ita selebra loron ita Nain Jesus Kristu nia moris, tanba nee tenki respeita, karik halo prezepiu tenki halo dook husi estrada, labele hemu lanu iha prezepiu laran, labele toka muzika nomos labele dansa iha prezepiu oin, hodi prejudika ema atu halo movimentu ba mai, no bele hamosu problema tanba mosu dezentendimentu hodi kria estabilidade la diak iha sidade Dili,” hatete Komandante PNTL Munisipiu Dili, Superintendente Xefe Polisia Orlando Gomes ba jornalista sira iha Komando PNTL Munisipiu Dili, Tersa (21/11/2023).
Nia esplika, tenki respeita prezepiu nomos respeita loron natal nia, tanba nee tenki halo prezepiu ho distansia neebe dook husi estrada publiku.
“Ita hotu hatene katak loron natal nee ema hotu selera, tanba loron neebe mak ita Nain Jesus nia moris, ho nunee hakarak informa tan dala ida katak, joven sira bele halo prezepiu ba maibe tenki halo dook ho distansia neebe dook husi estrada ibun, nafatin kontrola aan labele hamosu konfrontu ita tenki respeita loron espesial nee, tanba tinan ida ita selebra dala ida, nafatin iha ambitu hakmatek no kontenti ho familia, hodi nunee nafatin kria establidade diak iha bairu laran hakmatek, sidade Dili mos hakmatek iha ambiente neebe nakonu ho establidade dame no pas,” tenik Orlando.
Nia deklara, ba atividades halo prezepiu nee, parte Komunidade Munisipiu Dili mos sei hein despaixu husi Komando Jeral PNTL, maibe nia garante katak, komando sei fo orden atu joven sira bele halo prezepiu, maibe tenki distansia dook husi estrada no nafatin kria estabilidade diak, nakonu dame no pas iha sidade Dili.
(jen)
