DILI, STLNEWS.co – Polisia Nasional Timor Leste (PNTL) la autoriza sidadaun ida halao atividade check point iha publiku, tanba foin daudaun akontese estudante nain tolu neebe halao check point iha area Nain Feto, PNTL kaptura ona hodi tuir prosesu investigasaun.
Lia hirak nee hatoo husi Komandante PNTL Munisipiu Dili, Superientendente Xefi Polisia Orlando Pereira Gomes ba jornalista sira iha Komando PNTL Munisipiu Dili, Kaikoli, Kinta (27/07/2023).
“Ita hetan ona informasaun katak, estudante sira halo check point iha area Nain Feto nian. Hau atu dehan deit, laiha sidadaun ida halo check point iha publiku, so PNTL mak bele halo check point,” nia hatete.
Nia dehan, Komandante PNTL Munisipiu Dili orienta ona ba iha parte investigasaun no tranzitu atu buka no identifika ba sira neebe mak halao atividade check point ilegal.
Nia esplika, autoridade seguransa mak iha kompetensia atu bele halo check point iha fatin publiku.
“Foin daudaun nee ita identifika ona, no ita ninia ema sira ba kaer ona sira nain tolu atu halo prosesu infestigasaun,” nia esplika.
Nia informa, Komando PNTL Munisipiu Dili, koloka ona OPS iha suku hotu-hotu neebe eziste iha Munisipiu Dili. Kuaze suku tomak iha Munisipiu Dili koloka hotu OPS iha neeba, inklui mos eskola sira neebe mak iha Dili laran, maibe la koloka hotu. Indetifika eskola sira neebe prioridade liu koloka OPS ba iha neeba, atu bele hamutuk ho profesor sira haree atividade apredijazen nee lao diak.
Iha fatin hanesan, Xefi Juventude Postu Administrivu Nain Feto, Julio da Costa deklara, Komando PNTL Munisipiu Dili, liu husi Ekipa Patrulha Eskuadra Nian feto hamutuk ho Servisu Nasional Interlijensia (SNI) kaptura estudante nain 3 neebe komete krimi publiku iha area Kintal Boot, hodi halao atividade check point ba mikroleta sira neebe halao movimentu iha estrada publiku.
“Informasaun nee loos, ita nian PNTL kaptura ona estudante nain tolu neebe halo check point ba mikrolet nee kaer tiha ona, atu halo prosesu investigasaun, hau hanoin tenki hanesan nee mak diak, tanba check point nee Polisia Tranzitu mak halo ida nee, laos sidadun baibain mos halo, ida nee labele,” nia deklara.
(jen)
