ERMERA, STLNEWS.co – Segundu Komandante Polisia Nasional Timor Leste (PNTL) Komisariu Polisia Pedro Belo informa, durante tempu kampanha eleitoral nee, PNTL identifika pesoal balun nafatin tenta halo violensia ameasa ka teror ba povu.
Segundu Komandante PNTL, Komisariu Polisia Pedro Belo hatoo preokupasaun hirak nee liu husi nia diskursu iha ambitu serimonia Lansamentu Konstrusaun uma VPU nian iha Gleno, Ermera, Tersa nee (02/05/2023).
Nia dehan, iha tinan ida nee asuntu servisu todan ida mak eleisaun. Eleisaun parlamentar hanesan meus demokrasia neebe povu hili, PN liu husi sub-fraziu, Universal, Livre, Direitu, no idak-idak nian, atu garante segurasa ba eleisaun parlamentar, mak PNTL nia papel importante atu asegura seguransa ba lalaok prosesu demokratiku hahu husi kampanha eleitoral depois eleisaun.
Nia hateten, oras nee daudaun tama ona ba iha faze kampanha no partidu politiku hamutuk 17 mak lao hadulas iha teritoriu nasional, hodi hatoo sira nia programa ba iha komunidade.
“Tuir observasaun nian iha kampanha eleitoral, iha semana hirak nia laran, iha ema balun, iha pesoal balun, nafatin halo violensia ameasa no teror ba povu, labele livre atu eskolha partidu neebe sira hakarak,” dehan nia.
Tanba nee, PNTL neebe asegura seguransa lao ho demokratiku, labele fo toleransia ba aktus krimi sira nee. Atu asegura seguransa diak liu tan, mak PNTL konvida maluk Timor oan tomak, espesialmente komunidade Munisipiu Ermera atu hamutuk ho PNTL hodi kria pas no hakmatek iha rai doben Timor Leste.
Iha fatin hanesan, Prezidente Autoriedade Munisipiu Ermera, Euzebio Salsinha haktuir, ligadu ho eleisaun parlamentar ida nee nia husu ba komunidade sira hotu iha munisipiu Ermera, atu hakiak situasaun ida neebe harmonia no pas.
Nia dehan, partidu politiku ida neebe maka la hanorin nia militantes sira, mak halo problema polisia tenki kaer, nunee bele hatama iha sela neeba, depois hatama iha tribunal, nunee bele eduka nia atu hatene komporta iha sosiedade.
“Iha rumoris no hoax deit, barak liu nee buat particular laos politiku ida, no mensagem ba komunidade Ermera sira atu kria paz harmonia, tanba se mak tenta atu halo problema, Polisia tenki atua kedas ho rigorozu,” hakotu nia.
Nunee mos Xefe Suku Riheu Postu Admnistrativu Ermera Vila, Felisberto Soares Madeira Ximenes, hatutan, liga ba iha eleisaun parlamentar nian ba kampanha iha Ermera lideransa sira komunitariu hamutuk oh lider partidu politiku sira, asina ona akordu rua, ida ho organizasaun arte marsiais katak iha tempu kampanha sei la utilija atributu arte marsiais nian. No segundu asina ho Lider ParPol 17 asina ona faktus Unidade nasional ida, neebe maka inisiativa husi Komando PNTL Munisipiu Ermera.
“Parpol sira mai hatoo deit sira nia programa importante, atu hili iha dia 21, no Ermera rasik mos horseik partidu boot sira halo kampanha maibe laiha konflitu, tanba nee maka ami Ermera oan sira garante kria paz no unidade nasional,” dehan nia.
Total populasaun iha 138 mill nomos eleitores hamutuk 84 mill neebe sei ba partisipa iha eleisaun parlamentar ida nee, tanba nee sira mos garante katak, priosprioriedade ida nee, no komunidade Ermera rasik mos hakmatek no laiha violensia durante kampanha nia laran.
(efi)
