DILI-STLNEWS.co – Komando Polisia Nasional Timor-Leste (PNTL) Munisipiu Dili iha konhesimentu ba atividade graduasaun Persaudaraan Setia Hati Terate (PSHT) nian iha sidade Dili.
Informasaun nee hato’o husi Komandante PNTL Munisipiu Dili, Superientendente Xefi Polisia Orlando Pereira Gomes ba jornalista sira iha Kamando PNTL Munisipiu Dili, Kaikoli, Sesta nee (28/07/2023).
Nia dehan, PNTL simu ona karta konhesimentu husi organizasaun Arte Marsiais Persaudaraan Setia Hati Terante (PSHT) ba seguransa atividade PSHT ne’ebe sei halao iha Dili tempu badak.
“Ami iha ona konhesimentu, ami iha ona orden operasaun ba seguransa ba atividade ba organizasaun PSHT ninian,” nia tenik.
Nia esplika, tanba ne’e Komando PNTL Dili hamutuk ho Komando Operasaun Nasional tur hamutuk ona hodi atrasa planu seguransa ba atividade gradusaun PSHT nian, liu-liu oinsa mak bele atu akompanha prosesu pre teste to’o iha graduasaun.
“Ami husu ba organizasaun Arte Marsial PSHT tenki lao tuir orden ne’ebe Komando PNTL sei hasai iha tempu badak, atu nune’e atividade sira ne’e lao diak, labele hetan fali konfrontu durante iha atividade,” nia deklara.
Nia mos husu ba lider PSHT sira tenki kontrola membru sira, lider sira tenki kumpri regra ne’ebe mak iha, atu halo tuir regra PNTL Dili nian no regra Komisaun Reguladora Arte Marsiál (KRAM).
“Laiha ida atu lao tuir ninian hakarak, kuandu viola regra ne’e ita sei foti lider arte marsial ne’e nian, tanba ne’e husu atu mantein lao tuir regra, hodi organiza membru sira lao tuir orden, lao tuir lei, nune’e labele mosu insidente, konfronta durante halao atividades iha gradusaun,” nia informa.
Nia koalia, husu ba lider Arte Marsiais PSHT iha munisipiu ninian tenki kordena no koopera ho Komando PNTL Díli atu jere atividade sira ne’e lao diak para labele fo impaktu ba fali iha publiku.
Iha fatin ketak, Membru PSHT Joao da Costa informa, lider PSHT sira sempre kontrola ninia membru sira atu kumpri regra ne’ebe mak iha.
“Ami sempre atu halo tuir regra PNTL Dili nian no regra Komisaun Reguladora Arte Marsial (KRAM), maski ita organizasaun ketak-ketak, maibe ita mesak Timor oan hotu, tanba ne’e ami tenki kumpri regras sira ne’ebe ami nia PNTL fo sai,” nia deklara.
Entretantu, tuir informasaun ne’ebe STL asesu iha terenu katak, organizasaun Arte Marsial PSHT sei halo nia atividade graduasaun ba membru 11.000 iha fulan Agostu tinan 2023 ne’e, no atividade ne’e sei halo iha Munisipiu Dili, Baukau, Manufahi no Bobonaro.
(jen)
