BAUKAU, STLNEWS.co – Komando Polisia Nasional Timor Leste (PNTL) Munisipiu Baukau fo ona orientasaun ba membru sira, atu buka tuir autor neebe soe bebe iha Munisipiu Baukau.
Lia hirak nee hatoo husi Komandante PNTL Baukau, Superintendente Xefi Antonio de Sa ba jornalista sira iha knaar fatin Komando PNTL Baukau Kinta nee (20/07/2023).
Nia hatete, kazu soe bebe iha Baukau iha ona prosesu nia laran no bebe oan nee iha ona hospital ho kondisaun diak hela.
“Ita nia sub seksaun VPU too fatin asegura bebe no kazu agora iha hela prosesu nia laran, komando kontinua orienta ba ita nia parte seguransa hotu kontinua buka tuir autor ka inan neebe soe bebe, laos ema seluk, parese nia inan no ema nee iha Baukau laran, ida nee mak esforsu komando halo, ita kontinua buka tuir bebe nee nia inan ho autor neebe soe kosok oan nee,” katak komandante.
Oras nee PNTL identifika ona ka lae? Hatan ba kestaun nee, Komandante PNTL hatete, sira sei halo esforsu hodi buka tuir autor neebe soe bebe nee, no klaru katak bebe nee soe husi inan, tanba nee sedu ou tarde sei deskobre.
“Esperensia neebe ita iha tinan hirak ba kotuk iha duni ema soe bebe, maibe konsege detekta, soe tanba dala ruma Kestaun piskolojia, senti moe, depois identifika mak foin deskobre husi saida,” katak nia.
Komandante hatete, PNTL Baukau liu husi VPU sempre servisu hamutuk ho Rede Referal Uma Mahon, igreja no Ministeriu Solidaridade Sosial oinsa mak tau matan ba bebe neebe soe husi ema deskonhesidu nee.
Komandante hatete, ema soe bebe iha Munisipiu Baukau laos foin primeiru, maibe ho akontese loron agora hamutuk dala tolu ona, hahu iha Postu Administrativu Laga.
“Soe bebe nee krimi grave, tanba bebe nee inosente, no fator barak mak influensia ema nee soe, dala ruma oan nee rasik husi relasaun laos husi legal, entaun sira senti moe soe, maibe esforsu barak neebe ita halo nudar autoridade seguransa, parte igreja no parte relevante hotu ita kontinua sosializa halo dialogu senseblizasaun ba iha komunidade sira,” katak nia.
Iha loron Tersa, 18 fulan Julhu tinan 2023, tuku 21.00 OTL, Patrulha Eskuadra Baukau Vila akompanha VPU Eskuadra Baukau ba atende kazu ema deskonhesidu soe bebe Feto ida ho kondisaun moris hela iha ailaran, area Waituni, Bairo Watulete, Aldeia Lutumutu, Suco Trilolo Munisipiu Baucau.
Tuir informasaun nebe polisia investigasaun VPU Eskuadra Baukau Vila Ajente Xefi, Diana da Costa rekolha husi labarik ho naran Andri Marcel Belo Casametan, idade 12, hela fatin Aldeia Lutumutu, Suco Trilolo Baukau, katak iha tuku 5.30 OTL, labarik nee ho nia kolega sira tiru hela manu lin iha ailaran mak sira rona bebe tanis, entaun sira tauk hodi ba fo hatene fali senhora Angelina Soares neebe hein hela bibi besik iha fatin neebe soe bebe ba, hodi nuune ba haree bebe tanis duni no sadere hela fatuk ho kondisaun moris no molik.
Iha momentu nee kedan Angelina kous bebe refere lori ba nia uma no iha kalan nee kedan Polisia Eskuadra Baukau hamutuk ho inan Angelina neebe kous bebe lori kedan bebe refere ba iha Hospital HOREX Baucau hodi hetan tratamentu, no bebe baixa hela iha sala Neunatologio Hospital Regional Baukau no polisia nafatin buka tuir autor nebe soe bebe hodi submete ba prosesu investigasaun.
(eme)
