DILI, STLNEWS.co – Too agora Polisia Nasional Timor-Leste (PNTL) sei buka tuir hela autor neebe halo video hodi hatauk alin estudante kiik oan sira.
Kestaun nee hatoo husi portavos Komando Jeral Polisia Nasional Timor-Leste (PNTL), Superientendente Polisia António da Luz ba jornalista sira iha Komando Jeral PNTL Kaikoli Dili, kuarta (19/07/2023).
“Ita sei buka tuir nafatin, ita husu ona ba parte Komandante Munisipiu sira no Servisu Informasaun Polisia no Polisia Komunitaria atu kontinua buka autor nee,” nia hatete
Nia tenik, Komando Jeral PNTL kontinua orienta Komandante Munisipiu no Servisu Informasaun Polisia no Polísia Komunitaria, atu kontinua buka autor neebe halo video hodi habosok alin oan sira.
“Ita seidauk kaer suspeitu ida ba kazu ida nee, kuandu suspeita ona ema balun ba kazu nee, ami sei bolu medía mai hodi publika ba publiku atu hatene,” nia dehan.
Nia esplika, maski video nee tuir informasaun balun hateten, halo hanesan tiktok, maibe ba ida nee polisia konsidera ameasa ona no hatauk ona labarik sira, tanba nee labele, PNTL kontinua buka tuir autor sira nee hodi submete ba prosesu.
Iha fatin ketak, Komunidade Maria Banca dos Santos dehan, vidio tiktok neebe viral hodi hakbosok labarik kiik oan sira, labele husik autor nee livre, tenki kaer, atu nunee nia bele arepende nia hahalok nee, tanba habosok labarik hanesan nee krimi.
“Ita husu ba PNTL tenki kaer outor neebe halo tiktok hodi habosok labarik sira nee, tanba nee halo ita nia oan sira tauk ba eskola, tauk atu lao mesak, tiktok nee maski halimar, maibe labele, nee amensa ida ba labarik sira,” nia informa.
(jen)
