DILI, STLNEWS.co – Komandante Polisia Nasional Timor-Leste (PNTL) Munisipiu Dili, Superintendente Xefe Orlando Gomes kontinua fo hanoin ba membru Grupu Arte Marsial (GAM) ho Grupu Arte Ritual (GAR) evita hatais atributu iha fatin publiku.
Nia dehan, iha lei numeru 5/2017 konaba Arma Branka sei vigora hela no bandu atu ema lori kroat no bandu mos utiliza atributu arte marsial iha fatin publiku ka fatin neebe la autoriza atu uza atributu sira nee.
“Ita kontinua fo hanoin nafatin ba membru GAM ho GAR labele hatais atributu iha fatin publiku, sei hakarak uza bainhira treinu,” hatete Komandante Polisia Nasional Timor-Leste (PNTL) Munisipiu Dili, Superintendente Xefi Orlando Gomes ba jornalista sira iha Komandu PNTL Munisipiu Dili, Kuarta (23/08/2023).
Nia tenik, governu nia politika kreativa atividade grupu arte marsial ho arte ritual sira, atu membru sira bele dezenvolve sira nia talentu iha arte no desportu nian. Maibe laos atu dezenvolve fali krimi, hodi asaltu ema, tuda ema iha tempu kalan no ba naok ema nia sasan.
“Se Governu haree asaun sira neebe mak ita boot sira halo nee krime, Governu, Estadu, taka kuandu legaliza ona ita boot sira, imi tenke kumpri lei, regra iha nasaun ida neee. Ita iha KRAM, labele uza atributu para hodi hatais, nee lei bandu, para atu uza atributu iha fatin publiku,” nia esplika.
Iha fatin ketak Administrador Postu Administrativu Vera Cruz, Manuel Gusmão, dehan, antes nee sosializasaun konaba lei sira husi Komisaun Reguladora ba Arte Marsiais (KRAM), esplika klaru ona ba lider sira GAM ho GAR nian, maibe sira mak la kontrolu nia membru sira, tanba membru sempre involve ba kazu krimi
“Hau ho xefe suku, iha hanoin, atu konvida ita boot sira, maibe lider balu lakohi koopera, ita koalia ba loos mai loos,” nia informa.
Iha fatin hanesan Lider GAM PSHT, Joao Cardoso informa, prontu responsabiliza aktu krime no membru sira neebe hatis atributu PSHT iha dalan publiku sei laiha, tanba prontu hodi kontrolu sira.
“Sei membru ida neebe kontinua involve iha kazu krime no kontinua hatais atributu arte marsiais nian, Polisia tenke kaptura hodi responsabiliza sira nia aktu krime neebe sira halo, tanba fo hatene ona maibe ita kontinua halo ida-idak responsbilidade,” nia afirma.
(jen)
