LAUTEM, STLNEWS.co – Polisia Nasional Timor-Leste (PNTL), Munispiu Lautem, sei destaka membru 134 no apoiu husi Unidade Espesial nain 10, hodi asegura eleisaun ba orgaun suku segundu ronde iha Munisipiu Lautem atu lao hakmatek.
Lia hirak nee hatoo husi Komandate PNTL Munisipiu Lautem, Superintendente Antonio Rego Fernandes, ba STL iha nia knaar fatin Munisipiu Lautem, Sabadu (11/11/2023).
Komandante nee hatete, sentru votasaun ba eleisaun suku segundu ronde iha Munisipiu Lautem hamutuk 80, no membru PNTL iha Munisipiu Lautem sufisiente atu fo seguransa ba eleisaun suku no garantia katak, leeisaun iha Lautem sei lao hakmatek.
“Agora daudaun ita iha ona planu ba eleisaun ba orgaun suku segundu volta ninian, ita iha Munisipiu Lautem, iha sentru votasaun hamutuk 80, i membru PNTL Lautem sufisiente atu fo seguransa ba eleisaun suku neebe mak sei realiza iha dia 13, membru PNTL iha dia 12 sei desloka ba sentru votasaun sira atu fo seguransa ba Eleisaun Orgaun suku, husi prosesu votasaun, kontazen too apuramentu remata,” tenik Komandante nee.
Komandate nee salienta, antes iha eleisaun ba orgaun suku, primeiru ronde neebe realiza iha loron 28 Outobru 2023, iha munisipiu lao hakmatek maski iha sentru votasaun ida iha Postu Administrativu Iliomar, suku Ailebere mosu konfrontu entre Joven sira, tanba la simu ho rezultadu eleisaun.
Kontinua ba pajina 2
“Eleisaun ba orgaun suku iha munisipiu Lautem, iha primeiru ronde lao hakmatek, maske iha postu Administrativu Iliomar, Suku Ailebere akontese kazu ida, neebe mak rezulta ema nain rua mak kanek i konfrontu ida nee entre grupu, sira tuda malu bainhira kontajen lao, no grupu balun la satisfas ho rezultadu kontajen, tanba ne mosu konfrontu iha tempu neeba no kazu nee ita halo ona prosesu ba Ministeriu Publiku,” Antonio dehan.
Ulun boot PNTL Munisipiu Lautem nee dehan, ho problema neebe akontese iha Postu Administrativu Iliomar, iha eleisaun primeiru ronde, atu labele akontese, PNTL Lautem sei halo asesmentu ba iha fatin risku sira atu garantia eleisaun lao ho hakmatek povu vota ho livre.
“Ami nafatin halo asesmentu iha primeiru ronde mos ami halo asesmentu konaba fatin risku sira, tuir lolos parte Iliomar nee laos fatin risku, maibe nu fin akontese fali iha neeba, ami mos sei koloka membru PNTL iha fatin sira neebe ami identifika hanesan fatin risku,” dehan nia.
Komandante nee akresenta, kazu neebe akontese aas liu iha Munispiu Lautem maka kazu ofensa simples, tuir maka kazu violensia domestika, no kazu ofensa nee maioria komente husi Joven sira neebe involve an iha Grupu Artemarsiais no Grupu Arte Rituais.
(don)
