PNTL Liberta Hikas Suspeita Tolok Lider

DILI, STLNEWS.co – Polisia Nasional Timor Leste (PNTL) liberta hikas ona sidadaun feto ida neebe tolok ka hasai liafuan mal ba lider nain rua, tanba kumpri ona 72 oras.

Komandante Polisia Nasional Timor Leste (PNTL), Munisipiu Ermera, Superintendente Xefe Polisia, Justino Menezes hatoo kestaun nee ba jornalista sira liu husi telefone, Kuarta nee (10/05/2023).

Nia dehan, prosesu ba kazu refere iha ona Ministeriu Publiku (MP), rejista ona, tanba nee kontinua hein mandatu husi MP hodi submete ba prosesu investigasaun.

“Prosesu agora iha ona MP rejista ona iha neeba, tanba nee ami hein deit mandatu husi Ministeriu Publiku, karik submete mai ami, entaun ami kontinua halo investigasaun ba kazu nee,” dehan nia.

Nia afirma, mandatariu nee depende MP, bainhira haruka fali ba parte PNTL mak sei kontinua promove mandatu hodi halo investigasaun, maibe bele mos mandatu ba iha PSIK.

Entretantu, antes nee informasaun viral iha media sosial Facebook, komando orienta kedas ordem ba membru sira hodi tun direita iha terenu no buka tuir, hodi halo kedas kapturasaun ba sidadaun refere.

Ho nunee, ekipa PNTL Munisipiu Ermera halo kapturasaun ba sidadaun nee, iha oras tuku 16:30 iha loron 04 fulan Maiu 2023, hodi kumpri kedas durante oras 72 iha Sela PNTL, Munisipiu Ermera.

(efi)

LEAVE A REPLY

Please enter your comment!
Please enter your name here