PNTL Likisa Detein Sidadaun Indonezia 1, Tenta Tuir Votasaun

DILI, STLNEWS.co – Komando Polisia Nasional Timor Leste (PNTL), Munisipiu Likisa detein sidadaun mane 1 ho insial V, neebe mai husi Atambua, Indonezia, hodi tenta tuir votasaun.

Komandante PNTL Munisipiu Likisa, Superintendente Polisia Umbelina Soares informa, sidadaun nee polisia asegura iha area Sentru Votasaun Darulete, Postu Administrativu Bazartete, Munisipiu Likisa.

Sidadaun nee autoridade seguransa detein hodi halo prosesu investigasaun, hafoin hetan keixa husi autoridade no komunidade sira neebe lamenta, tanba sidadaun refere hela iha Atambua, Indonezia, no tinan kotuk iha eleisaun prezidensial mai tuir votasaun, depois fila fali ba hela iha Indonezia.

“Polisia detein, tanba tuir informasaun katak, dadersan povu sira ba formatura atu tuir votasaun, nunee komunidade Darulete konhese hela sidadaun nee, katak nia mai uosi Atambua uluk mai tuir votasaun fila tiha ba Atambua, depois nia mai atu tuir votasaun atu vota ba partidu ida neebe ita la hatene, tanba nee mak povu halo reasaun hodi polisia no fiaskais sira ba asegura tiha hodi halo investigasaun,” informa Komandante Umbelina ba STL via telefone, Domingu (21/5/2023).

Nia dehan, Komando PNTL Lisisa halo ona investigasaun hodi haree karik ema nee komate krimi eleitoral, sei prosesa tuir lei. Maibe daudaun nee sei hein prosesu investigasaun klean neebe entrega ona ba Komando Jeral PNTL.

Daudaun nee Komando Polisia Likisa entrega kedas sidadaun refere ba Polisia Nasional Servisu Investigasaun Kriminal (PNSIK) Komando Jeral PNTL.

(cri)

LEAVE A REPLY

Please enter your comment!
Please enter your name here