DILI, STLNEWS.co – Hahu husi Janeiru too Agostu tinan nee, Polisia Nasional Timor Leste (PNTL) liu husi Seksaun Tranzitu Seguransa Rodaviaria Nasional, rekolha reseitas hamutuk US$ 390.000 husi infrator ba kofre estadu.
“Ita nia Unidade Tranzitu rekolha resita hamutuk US$ 390.000 resin husi infrator sira iha territoriu laran ba kofre estadu,” hatete Komandante Tranzitu Seguransa Rodaviaria Nasional, Superientendente Asistente Luis da Costa ba jornalista iha Komando Jeral PNTL Dili, Tersa (05/09/2023).
Nia dehan, reseitas hirak nee rekolha husi tipu infrasaun, inklui asesores motorizada no kareta la kompletu, dokumentu la iha, SIM la iha, la utiliza helem, kontra orden autoridade, nunee mos para sala.
“Husi tipu infrasaun hirak nee mak ita hahu husi fulan Janeiru too Agostu nee ita rekolha reseitas husi infrator sira hamutuk US$ 390.000,” nia tenik.
Nia esplika, reseita hirak neebe sira rekolha no kontribui ona ba kofre estadu, tanba polisia la rai iha komando.
Iha fatin ketak, Motorista Jacinto da Silva esplika, PNTL halao nia servisu diak tebes, sira halo aprensaun ba viatura sira neebe mak kontra lei kodigu estrada, hanesan la uza kapaseti, dokumentus laiha, no sim laiha.
“Ita la uza kapaseti, dokumetus laiha, nee sira fo kedan kwitansi ka resibu hodi ba selu multa iha banku, depois osan sira nee sei ba iha kofre estadu, atu halo dezenvolvimentu iha ita nia rai,” nia deklara.
Nia koalia, ba sira neebe selu ona polisia fo fila ona sira nia viatura, no sira neebe seidauk selu iha banku polisia asegura nafatin hela viatura iha komandu.
Nunee Diretor Ezekutivu Fundasaun Mahein, Nelson Belo informa, durante nee PNTL nia kontribuisaun ba estadu boot tebes, liu husi reseitas nunee mos seguransa, maibe kondisaun minimu ba sira nee seidauk diak.
“Ita husu ba governu, karik bele liu husi reseitas neebs mak polisia kontribui bele utiliza hodi hadia sira nia kondisaun servisu, kompleta ekipamentu modernu sira hodi moderniza instituisaun Polísia Nasional Timor-Leste,” nia hatutan.
Nia afirma, fulan-fulan polisia hatama reseitas ba kofre estadu nee boot tebes, maibe tanba saida mak labele hadia sira nia kondisaun, nunee mos halo kapasitasaun ba sira hodi aumenta sira nia profisionalizasaun servisu iha terenu.
(jen)
