DILI, STLNEWS.co – Portavos Komando Jeral Polísia Nasional Timor-Leste (PNTL), Superientendente Polisia António da Luz hateten, Komando PNTL rekonhese susar atu halo kontrolu ba atividade ilegal hanesan sigaru ilisitu no atividade kontra bandu neebe lao iha linha fronteira, tanba rekursu neebe mak komando koloka iha linha fronteira agora daudaun sei menus.
“Ita nia Unidade Patrolhamentu Fronteira (UPF) no Unidade Polisia Maritima (UPM), hatudu servisu neebe masimu, maibe linha fronteira nee fatin neebe mak luan tebes-tebes, entaun ho membru neebe mak limitadu, fasil tebes fo fatin ba ema atu halo atividade ilegal sira,” hatete António da Luz ba jornalista sira iha Komando Jeral PNTL Kaikoli Dili, kuarta (19/07/2023).
Nia tenik, atu haforsa seguransa iha linha fronteira mak kabe ba kompetensia Komando Jeral, atu bele koloka tan rekursu balun no ekipamentu ba membru sira atu bele fasilita halao servisu diak liu.
“Ita hatene katak iha fronteira iha postu barak ho distansia neebe mak dook no luan tebes, entaun presiza tan membru UPF barak atu bele servisu, tanba nee hau hanoin Komando PNTL iha planu atu bele haree ida nee, oinsa reforsa ita nian fronteira,” nia esplika.
Maski ho situsaun sira nee, portavos Komando PNTL nee informa, Komando PNTL kontinua esforsu hodi orienta nafatin ba membru sira halao servisu, halo servisu ho lo-loos, halao servisu ho responsabilidade.“ Nasaun nee ita nia, entaun oinsa mak bele atu asegura,” nia koalia.
Nia mos husu ba parte hotu-hotu liu- liu Komunidade sira neebe mak hela iha linha fronteira atu apoia koopera hodi servisu hamutuk ho autoridade polisiál nian, karik hetan informasaun ruma bele pasa ba parte polisia atu nunee bele halo prevesaun ba atividade ilegal iha fronteira.
“Maibe ita garantia deit ba polisia, hau hanoin katak difisil tebes, maibe kuandu ita hotu koopera malu ho diak, husi komunidade tantu polisia, hau hanoin katak ita bele rezolve atividade ilegal sira neebe mak tama iha ita nia rai,” nia argumenta.
(jen)
