Prizaun Gleno Menus Transporte

DILI, STLNEWS.co – Oras nee daudaun iha Prizaun Gleno difikuldade neebe sira hasoru mak menus transporte, no guarda prizional balu idade avansadu daudaun ona.

“Ami nia kareta antigu, no oras nee daudaun ami iha kareta rua deit hodi tula dadur sira ba mai tuir julgamentu,” dehan Diretor Prizaun Gleno, Nito Dos Santos ba STL liu husi telefone, Tersa (13/06/2023).

Nia sublina, durante nee iha deit transporte rua mak sira uza ba mai, tula dadur sira mai tuir julgamentu, nomos tula dadur sira neebe halo tratamentu iha hospital.

Diretor nee konsidera, kareta neebe sira uza antigu ona, tanba nee espera governu foun bele responde ba sira nia preokupasaun nee, tanba konsidera transporte mos sai hanesan parte importante ida hodi apoiu sira nia servisu.

Tuir Nito, governu foun neebe sei mai, hanesan diretor nafatin iha koordenasaun ba malu, nafatin hatoo preokupasaun neebe sira hasoru, tanba knaar nebee sira halo mos sai hanesan knaar importante ida.

Iha fatin ketak, Akademiku UNTL Rafael de Jesus dehan, tuir lo-loos Ministru Justisa presiza haree ba kestaun sira nee.

Ita hanoin preokupasaun sira hanesan nee, sai mos preokupasaun importante, no Ministru Justisa kuandu rona preokupasaun sira hanesan nee, tuir lo-loos tenki buka kedan solusaun,” dehan nia.

Nia hatutan, kuandu transporte rua deit mak uza, bele mos difikulta guarda sira nia servisu, diak liu presiza aloka tan transporte balu atu sira bele uza troka malu tula dadur sira ba mai.

Akademiku rekonhese, dadur sira nia servisu mos importante atu asegura dadur sira, presiza kria kondisaun diak ba sira, atu sira bele halao servisu ho diak.

(ter)

LEAVE A REPLY

Please enter your comment!
Please enter your name here