DILI, STLNEWS.co – Polisia Nasional Timor-Leste (PNTL) sei bolu Lider Arte Marsiais Persaudaran Setia Hati Terate (PSHT) nomos Arte Ritual 77 hodi responsabliza ba aktu krimi neebe akontese iha serimonia gradusaun PSHT, neebe halo estragus sasan.
“Konfrontu nee ami sei bolu lider Arte Marsiais PSHT no Arte Ritual 77 sira hodi hatan, no sira nia aktu no tenki responsabilidade ba aktu neebe sira nia membru halo,” hatete Komandante PNTL Munisipiu Dili, Superientendente Xefi Polisia Orlando Pereira Gomes ba jornalista sira iha Komando PNTL Munsipiu Dili, Kaikoli, Tersa (15/08/2023).
Nia dehan, bainhira Arte Marsiais nia lideransa mak kontrolu nia membru sira hodi respeita Arte Marsiais sira seluk, karik laiha konfrontu, maibe tanba menus kontrolu nia membru sira la organiza diak, nee maka sempre mosu falhansu no mosu konfrontu no ema balun sai vitima no uma sira hetan estragus.
Nia tenik, membru halo konfrontu, lider sira mak iha responsabilidade ba Arte Marsiais sira nee, tanba sira mak kontrola nia membru sira.
“Tanba nee mak antes nee hau bolu lider Arte Marsiais sira no Arte Ritual sira, tanba sira mak ladun kontrola masimu ba nian membru sira,” nia tenik.
Nia esplika, molok atividade graduasaun nee bolu ona lider Arte Marsiais Ikatan Kera Sakti (IKS), Persaudaraan Setia Hati Terate (PSHT) nomos lider grupu arte KORK no 77, husu atu kontinua kontrola sira nia membru hodi koopera pas no estabilidade.
“Kuandu sira la kumpri ida nee, hau kuandu kontaktu sira nia lider sira mos sei simu konsekuensia, tanba nee husu sira atu asegura sira nia membru sira, nunee bele kontribui ba pas no estabilidade,” nia informa.
Iha fatin ketak, Presidente KRAM, Octavio da Conceicao esplika, husu ba lider grupu Arte Marsiais no grupo Arte Ritual bele apela membru sira tur hakmatek hodi kria paz no estabilidade iha rai doben ida nee. Tanba konfilitu entre grupu entre Arte Marsiais no Arte Ritual kontinua akontese iha fatin-fatin, tanba membru sira laiha disiplina.
Nia mos husu ba membru sira atu oferese ba lei numeru 5/2017, konaba regulasaun atividade Arte Marsiais no Arte Ritual no arma branka hodi efeita aktu provokasaun iha futuru, tanba responsabilidade ba aktus krime publiku nee responsabilidade individual, laos organizasaun mak haruka sira no laos komisaun regulador arte marsiais mak tenki tutuir sira hodi hatete ka kontrola.
Nunee mos Konseleiru Masimu Arte Ritual 77, Estevao Freitas Espirito Santo informa, ba Membru Arte Ritual hotu atu mantein disiplina hodi kontribu paz iha Timor-Leste, tanba membru neebe kria instabilidade Lider Arte Ritual nee sei la responsabiliza, maibe entrega ba PNTL hodi prosesu tuir dalan legal.
“Ami fo nafatin mensajen ba membru neebe iha Sidade Dili laran no munisipiu hotu-hotu, nafatin mantein idak-idak nia pozisaun, labele mete kualker ema nia problema, kuadu ita boot mete, ita nain mak simu nia konsikonsia,” nia afirma.
(jen)
