DILI, STLNEWS.co – Komando FALINTIL – Forsa Defeza Timor Leste (F-FDTL) foti Saudozu Venacio Feraz, hodi sai hanesan mahein ba Polisia Militar.
Liu husi diskursu, Xefi Estadu Maior Jeneral F-FDTL, Tenente Jeneral Domingos Raul Falur Rate Laek hatete, ohin halibur malu iha fatin ida nee halo buat kiik ida, atu dignfika Eroi Nasional ida neebe naran Venancio Feraz, uluk hotu-hotu rona katak nia mak Leaun Fronteira nian.
Tanba nee agradese ba Jeneral Reformadu Lere, tanba nia mak ho inisiativa lori naran ida nee mai sai hanesan patronu Polisia Militar.
“Obrigadu Maun Lere, tanba ita boot nia sabedoria no desizaun ita mai realiza daudaun ona no lansamentu primeira pedra ba iha monumentu ida nee,” dehan nia liu husi diskursu iha Edifisiu Polisia Militar Mascarinhas, Dili, Kinta (20/07/2023).
Nia parte mos agradese ba familia husi Saudozu Venancio Feraz nian neebe mak mai husi Ainaro.
Nia haktuir, ema sira neebe mak Feraz nia soldadu disipilina makaas iha fronteira.
“Tanba nee, mensajem ba imi hotu husi ofisiais, Sarjentu Unidade Polisia Militar nian, disipilina ida nee laos imi agora mai konkista deit ho imi nia matenek agora, maibe disiplina hanesan ema ida ohin loron ita simboliza iha fatin nee, ita fo omenajem ba nia,” dehan nia.
Iha fatin hanesan, Tenente Jeneral Reformadu, Lere Anan Timur hatete, foti Saudozu Venancio Feraz hodi sai mahein ba Polisia Militar nee nia inisiativa.
“Ohin Komandante Falur dehan hau mak desidi, loos duni hau nia inisiativa, maibe hau husu hau nia membrus nia hanoin mos, kuaze ita kumpriende iha militar nee ema boot desidi mak nee ona, entaun hau desidi lori Saudozu Feraz mai Polisia Militar nudar padrueru instituisaun ida nee nian, tanba iha razaun rua. Razaun primeiru mak haree ba Saudozu Feraz nia karakter no segundu nia prinsipiu,” nia tenik.
Nia dehan, Saudozu Feraz Komandante ida iha karakter ida ke dala ruma laos komandante hotu-hotu iha karakter hanesan ho nia. Nia ema ida neebe mak seriu la halimar ho nia responsablidade, nia responsavel boot hanesan Komandante.
“Ita hatene katak iha situasaun difisil iha ailaran, maibe hau nia Komandante Feraz ema ida neebe mak ho karakter hatene hadomi nia sub alternu sira nomos soldadu sira, i hatene ema nia problema no difikuldade,” katak nia.
Nia haktuir, Komandante Feraz iha prinsipiu ida deit katak, mate ka moris ukun rasik aan, no firme iha nia prinsipiu.
“Hau hela hamutuk ho nia tinan ida, hau konhese diak nia, kuandu ami tur hamutuk dala ruma husi loraik too dader mos iha, ami koalia konaba funu, partikularmente hau atu dehan katak, Feraz laiha hau mos laiha, tanba Feraz iha nee mak hau mos iha nee, iha situasaun difisil neebe mak hau enfrenta iha 1984, kuandu hau kanek todan ho Feraz mak hau konsege moris,” hakotu nia.
Entretantu, reprezentante familia Saudozu Venancio Feraz nian, Mariano Malik hatete, lori familia enjeral Ainaro espesial ba familia Fatumera uma lisan Veisoru senti onradu no orgulhu, tanba estadu liu husi forsa armadas F-FDTL bele rekonhese no tau saudozu sai hanesan patronu ba iha Unidade Polisia Militar.
“Ida nee sai hanesan orgulhu boot ba familia Ainaro, liu-liu ba familia Fatumera uma lisan Veisoru,” katak nia.
(mar)
