Semana Ida Tan PNTL 158 Reforma Ikus Ona

DILI, STLNEWS.co – Membru Polisia Nasional Timor-Leste (PNTL) nain 158 sei reforma ikus iha loron 31 de Maio tinan nee, hodi bele involve aan iha prosesu seguransa sosial.

Visi Ministru Interior (VMI) Antonio Armindo hatoo asuntu nee ba jornalista sira liu husi intervista, bainhira remata enkontru ho Konselhu Ministru iha Palasiu Governu Dili, Kuarta nee (16/05/2023).

Nia dehan, naturalmente sira nia lista nee sai tiha ona no publika tiha ona iha Jornal da Republika, tanba ho eleisaun nee mak minsitru no Visi Ministru hotu ba tuir kampanha depois ba servisu, maibe hanoin katak iha fulan Maiu nee iha obrigatoriu ona para sira bele kompleta sira nia dokumentus sira nee, para haruka ba iha Seguransa Sosial.

Neebe iha nee sei servisu kordenasaun entre Seguransa Sosial ho Komando para bele lori sira nia dadus hirak nee, dadus hirak nee kompletu ona iha Gabinete Ministeriu Interior nian. Espera katak, Ministru Gabinte, Ministru Interior nian ho komando bele entrega ona ba iha Seguransa Sosial para sira bele hatama ba iha baze de dadus, nunee sira mos bele hahu.

“Ita hanoin dehan katak 31 de Maio nee loron ikus ba sira bele reforma ona, para sira bele hahu involve aan iha sira nia prosesu ida neebe mak iha Seguransa Sosial,” dehan nia.

Maibe haree tuir kondisaun neebe mak iha, agora daudaun lao iha eleisuan, nunee sei iha desizaun husi Komandante Jeral ho Ministru do Interior.

Aleinde konaba kondisaun nee, governu kria nanis husi Seguransa Sosial, neebe laos dehan ministeriu mak atu kria fali laiha, nee Seguransa Sosial, ema hotu hotu, se mak reforma ba rekore iha neeba.

“Purtantu, kondisaun nee iha neeba tiha ona, inklui funsionariu se deit mak ho nia reforma nia ba Seguransa Sosial,” dehan nia.

Entretantu, husu konaba halo rekrutamentu ba membru PNTL foun VMI nee hatan, tuir nia, hanoin hanesan nee, jatamente iha tinan 2023 la konsege halo rekrutamentu, maibe iha tinan 2024 nee tenki halo rekrutamentu, tanba iha reforma, iha kadernizasaun ba sira neebe mak iha ona, tanba nee tenki iha rekrutamentu.

Iha parte ketak, Diretor Ezekutivu Fundasaun Mahein (FM), Abel Amaral hateten, membru Polisia Nasional Timor Leste (PNTL) nain 158 hatama ona naran ba lista reformadu, tanba nee Sosieddae Sivil husu atu halo rekrutamentu ba membru foun. Tanba instituisaun PNTL dezde tinan kotuk Komando Jeral hatoo ona katak, instituisaun PNTL sei menus rekursu umanu.

“Agora ho lista reforma neebe mak fo sai ona iha Jornal da Repiblika nee iha 158, nee signifika katak PNTL instituisaun ida neebe mak responsabiliza ba seguransa interna, sira presiza numeru rekursu umanus,” dehan nia.

Ho reforma neebe mak fo sai ona iha Jornal da Republika, husu ba Ministru Interior (MI) atu hahu hanoin ona, oinsa mak atu bele prienxe ba numeru neebe mak reforma.

“Maibe ami fiar katak labele halo rekrutamentu ba iha Oitavu Governu, maibe ba governu foun, bele hanoin ona katak, oinsa mak atu bele prienxe fila fali ka, substitui membru PNTL neebe mak tama ona idade reforma, naran fo sai ona iha Jornal da Republika,” dehan nia.

FM hanoin katak, governu presiza tau atensaun seriu ba iha nesesidade instituisional PNTL nian, liu-liu ba rekursu umanu, tanba servisu neebe mak PNTL eleva nee, responsabilidade ida neebe mak todan.

(efi)

LEAVE A REPLY

Please enter your comment!
Please enter your name here