DILI, STLNEWS.co – Komandante Polisia Nasional Timor Leste (PNTL), Munisipiu Dili, Superintendente Xefe Polisia, Natercia Eufrazia Soares hateten, durante selebrasaun loron santa paskua nian, rejistu kazu ho numeru neebe menus tebes.
Kestaun nee Superintendente Xefi Polisia, Natercia Eufrazia Soares hatoo ba jornalista sira iha Edifisiu UEP Bairu-Pite, Dili, Segunda nee (10/04/2023).
Nia dehan, durante loron paskua iha Dili, Komando PNTL Dili rejistu kazu asidente no insidente neebe iha ho numeru kiik tebes.
“Asidente unsidente menor ita rejista, maibe la aas, maizumenus kalan ida mosu krimi kiik, hanesan Violensia Domestika nee iha ita rejista, kazu Agregasaun Fizika ita rejista, maibe ho nia numeru la liu husi 5 durante festa paskua nian,” dehan nia.
Aleinde, iha bairu-bairu tuda malu, maibe haree ikus-ikus nee menus, ho polisia tomak apoiu husi Unidade Espesial Polisia (UEP), Polisia Maritima (PM). Ekipa hotu neebe halao misaun iha Dili.
“Ita halo vijilánsia makaas nia rejultadu mosu dunik tuda malu, maibe ita kompara ho tempu sira ba nee, ida nee kiik liu,” dehan nia.
Nia hateten, espera katak ba oin laos sira la tuda malu, tanba hetan polisia nia prezensa, maibe sira respeita no hakruk ba lei katak tuda malu nee la diak, no sira sei hetan sansaun ou sei hetan konsekuensia husi sira nia aktus krimi hirak nee.
Maski nunee nia hatutan, liga ba iha festa demokrasia, polisia no forsa hotu inklui Forsa Defeza sei fo apoiu, hodi konsentra sira nia forsa masimu atu fo apoiu. No iha neeba nee tanba sa mak komando sempre fo atensaun ba nia komunidade sira, liu-liu ba autor kriminozu sira ka maluk neebe uza ema para halo violensia.
Tanba konsekuensia nee sei makaas liu, no komando sei hola medida ida neebe mak rigorozu hodi atua situasaun kualker saida deit sei mosu, durante kampanha, eleisaun too formasaun governu ida nee.
Iha parte ketak, Komadante Tranzitu Munisipiu Dili, Inspetor Polisia Domingos Sarmento Gama hatutan, relasiona ho selebrasaun loron boot festa paskua nee, kada tinan-tinan sempre halo atividade refere. Tanba nee, konaba kolokasaun ba membru tranzitu sira nee, mantein ho planu komando nian, tuir hanesan planu komando nian iha tinan hirak liu ba.
“Neebe, tuir planu operasaun komandu nian, ita koloka ona kuaze fatin sira neebe mak ita indetifika loron boot paskua halo misa, ita nia membru sira koloka hotu,” dehan nia.
Tanba nee, atividade membru sira atu halao seguransa ba iha iha igreja sira mak halo atividade misa paskoa, tuir Komandante Tranzitu nee hanoin nee la iha problema. Nunee mos kona ba seguransa liu-liu parte tranzitu Dili nian, so kumpre planu ho orden komando nian.
(efi)
