Situasaun Tinan Foun, PNTL Fo Seguransa Masimu

DILI, STLNEWS.co – Komandante Polisia Nasional Timor-Leste (PNTL) Munisipiu Dili, Superintendente Xefi Polisia, Orlando Gomes hatete, situasaun iha loron 1 Janeiru 2024, neebe sidadaun hotu-hotu paseiu iha tasi ibun lao kontroladu, tanba hetan seguransa masimu husi PNTL.

Nia dehan, PNTL liu husi Komando Munisipiu Dili koloka membru PNTL sira iha terenu fo seguransa masimu iha loron 1/01/2024, sidadaun hotu-hotu iha sidade Dili halao atividade paseiu ka rekreasi iha tasi ibun.

“Ita nia sidadaun sira neebe halo paseiu iha tasi ibun, ita koloka hotu membru PNTL sira iha terenu, husi Tranzitu, UPM, UPE, Makikit Munisipiu Dili, hodi apoiu Komando PNTL Munisipiu Dili atu fo seguransa masimu ba sidadaun sira,” hatete Komandante PNTL Munisipiu Dili, Superintendente Xefi Polisia, Orlando Gomes ba jornalista sira iha Komando PNTL Munisipiu Dili, Kinta (04/01/2024).

Nia esplika, loron 1 Janeiru 2024 nee loron neebe importante ba sidadaun hotu-hotu atu selebra tinan foun, tanba nee membru PNTL tenki koloka hotu ba terenu.

Iha fatin ketak, Sidadaun Julio da Costa Monteiro dehan, loron 1 Janeiru 2024 nee loron neebe sidadaun hotu-hotu halibur malu ho familia ho kolegas hodi selebra tinan foun.

Situasaun iha momentu neeba lao kontroladu, tanba hotu-hotu hakarak hamutuk ho familia no kolegas atu selebra tinan foun, tanba iha tasi ibun ema barak tebes, maibe laiha ema ida mout iha tasi ou baku malu iha tasi.

(jen)

LEAVE A REPLY

Please enter your comment!
Please enter your name here