DILI, STLNEWS.co — Roo Marinha Real Britania (HMS) Spey ho naran River Class Offshore Patrol Vessel ho marka (P 234), husi nasaun Reinu Unidu vizita Timor Leste (TL) durante loron rua hahu hosi loron 25 to’o 27 Agostus 2023. Bainhira Roo nee to’o iha Portu Dili, Sesta (25/8/2023) simu ho kultura tradisional Timor nian.
Komandante Roo HMS Lt Cdr Mattihew Millyard ba jornalista sira hatete katak objetivu husi vizita Róo River Class Offshore Patrol Vessel nee atu halao interkámbiu kulturál ho Roo Marina Timor nian, oinsá bele fó suporta diak ba malu, hodi hametin relasaun bilateral entre TL ho United Kingdom.
Nia hatete katak sira laos deit vizita TL, maibé mós ba rejiaun Indo Pasífiku, tanba situasaun iha mundu halo destrui ba ambientál, nunee sira hakarak introdús katak husi Róo Britannia HMS nee hakarak amigavel tebes ba nasaun ambientál hotu-hotu iha mundu.
“Ami nia vizita ida nee oinsá bele suporta liután TL nia setór ekonomia no seguransa, laós mai atu halo destruisaun ba ambiente maritima TL nian. Ami mai tanba ami konsidera TL mos nuudar nasaun importante ba nasaun Britaniku,” katak Komandante Roo HMS, Mattihew Millyard.
Nia mos dehan katak Roo Britaniku HMS Spey husi Reinu Unidu vizita TL ba atividade troka kultura ho marinha TL no estudante husi eskola internasional, hosi loron 25 to’o 27 fulan Agostu 2023.
Tuir nia, vizita Roo Marinha Reinu Unidu nian nee hanesan vizita dahuluk ba TL, depois Roo servisu hamutuk ho nia irmaun ida ho naran Roo Marinha HMS Tamar, durante tinan lima iha Rejiaun Indo-Pasífiku.
Nia hatutan tan katak prezensa Roo Marinha Reinu Unidu nian iha Rejiaun Indo-Pasifiku hodi kolaborasaun ho nasaun amigu no parseiru sira, tanba Roo nee nee ajuda hasae desafiu seguransa no apoia nasaun sira atu minimiza impaktu mudansa klímatika. HMS Spey mak Roo Marinha Reinu Unidu nian neebé “frendli ambiente” tanba iha konvertor katalítiku iha toka absorpsaun atu diminui emisaun CO2.
Entretantu, Embaixador Britaniku (Dezignadu) ba TL, Dominic Jermey hatete Reinu Unidu konsidera TL nuudar nasaun importante ba nasaun Britaniku iha mundu. Tinan 20 resin sira akompaña TL nia luta ba ukun rasik-an.
“Ami konsidera TL, nasaun importante mos iha mundu. Durante tinan 20 resin, ami mós akompaña TL nia luta ba ukun rasik-an. Tanba nee, Reinu Unidu nomea ona hau atu asumi kargu Embaixador ba TL. Hau sei entrega karta kredensial ba Prezidente Republika, Jose Ramos Horta. Nunee, ba futuru hametin relasaun bilateral entre TL ho Reinu Unidu diak liutan,” dehan Dominc Jermey.
Diplomata UK neebe daudaun nee asumi hela kargu Embaixador Britaniku ba Indonezia nee dehan katak nasaun Britániku nuudar nasaun ida neebé mak sai forma ho konsellu seguransa iha UK nian.
“Ami mai iha TL tanba iha razaun polítika governu nian, entaun posivel ba ami mai iha nee. Tanba nee mak reprezenta nasaun Britániku nia naran, konsidera TL nuudar nasaun importante mós iha mundu liuliu ba nasaun Britaniku,” katak nia.
Tuir observasaun STL nian iha terenu hatudu katak juventude Timoroan aprezenta kultura tradisional Timor nian, hanesan dansa no baku babadok iha Komandante Roo HMS Lt Cdr Mattihew Millyard ho ninia soldadu sira no Embaixador Britaniku, Dominc Jermey.
(mik)
