UPM Halo Kontra-Bandu Tipu 3

DILI, STLNEWS.co – Oras nee daudaun Unidade Polísia Maritima (UPM) halo ona aprensaun ba atividade negosiu kontra-bandu tipu 3 mak hanesan sigaru, petasan no kilat manu iha kapital Dili, neebe tama ilegal husi fronteira.

“Kontra-bandu neebe mak ita halo aprensaun nee iha tipu tolu, hanesan sigarru ilegal, petasan no kilat manu, nunee mos ita halo aprensaun ba kareta baskolante ida neebe mak autor sira utiliza hodi transporta sasan ilegal hirak nee liu husi fronteira Batugade,” hatete portavoz Komando PNTL, Superintendente Polisia Antonio da Luz ba jornalista sira iha Komando Jeral PNTL Dili, Tersa (19/12/2023).

Nia esplika, halo aprensaun ba evidénsia hirak nee, UPM mos halo kapturasaun ba autor sira submete ona ba prosesu investigasaun.

“Evidensia neebe ita prende, daudaun nee ita asegura hela iha Komando PNTL hodi submete ba prosesu,” nia deklara.

Iha fatin ketak, Diretor Ezekutivu Fundasaun Mahein (FM), Nelson Belo Informa, tranzasaun ilegal neebe konsege tama too Dili nee governu tenki halo investigasaun ba servisu autoridade seguransa, sira neebe destaka iha postu-fronteira.

“Ita haree atividade tranzasaun ilegal nee akontese beibeik ona, tanba nee presiza investiga didiak membru sira neebe koloka iha fronteira tanba saida,” nia hatutan.

Maibe nia dehan, parte ida mos haree ba ekipamentu hodi deteta atividade tranzasaun ilegal sira, governu tenki responde nunee mos aumenta pesoal iha fronteira.

(jen)

LEAVE A REPLY

Please enter your comment!
Please enter your name here