UPM Realiza Aniversariu Ba Dala-20

DILI, STLNEWS.co – Unidade Polisia Maritima (UPM) realiza aniversariu ba dala 20, Visi Ministru Interior Antonio Armindo husu governu foun mai tau importansia ba ekipamentus Unidade Polisia Maritima (UPM).

Liu husi diskursu, Visi Ministru Interior Antonio Armindo hateten, ohin hamutuk iha serimonia ida nee, hodi komemora loron aniversariu Unidade Polisia Maritima ba dala 20.

Nia dehan, iha dader kmanek ida nee, ema hotu kontinua sai sasin ba ezistensia husi Unidade Polisia Maritima, neebe bele kompara hanesan labarik ida karik, nia hahu joven daudaun no tasak ba daudaun iha mentalidade no kapasidade, entermus intelektualidade nomos profisionalizmu nian.

Unidade ida nee hola papel importante tebes hodi tau matan ba tasi neebe ho luan 84,02%, husi rai maran neebe iha riku soin oin-oin iha tasi laran nomos tasi okos.

lha parte seluk, mezmu hasoru difikuldade oin-oin iha parte ekipamentu suporta sira, hanesan limitasaun ba lancha nomos Ro boot, hodi halo patrulhamentu ho rutina, espiritu servi kontinua manas iha unidade ida nee nia fuan.

Tanba ida nee bele haree husi sira nia prestasaun durante nee. Governu liu husi Ministeriu Interior durante nee halo mos esforsu lubuk ida, hodi apoiu unidade ida nee, hanesan kontinua tau prioridade ba iha manutensaun ba roo UPM nian nomos roo Kayrala, hodi kontinua halo operasaun.

“Ita espera, atu iha governu foun neebe sei mai, bele kontinua tau atensaun liu tan, liu husi sosa roo patrulha neebe adekuadu hodi bele uza ba halo operasaun no kontrolu ba ita nia tasi ho masimu, liu-liu iha parte kosta sul neebe riku tebes ho ikan no riku soin seluk neebe durante nee ita menus halo kontrolu, hodi fo biban akontese peska ilegal,” dehan nia liu husi diskursu, iha ambitu serimonia selebrasaun aniversario UPM ba dala 20, iha Edifisiu UPM Lesidere Dili, Sabadu ((27/05/2023).

Nia hateten, tuir dadus husi Ministeriu Agrikultura no Peskas, husi tinan 2018-2020, nasaun lakon osan US$ 11,728,470.00, iha deit tinan 3 nia laran, tanba movimentasaun roo ilegais hamutuk 224 neebe halo peska ilegal hodi naok Timor nia ikan, purvolta 288,998 toneladas husi tasi Timor nian.

Situasaun ida nee akontese tanba limitasaun ekipamentu neebe suporta ba unidade ida nee hasoru, no espera sei rezolve iha governu foun neebe sei mai.

“Iha imi nia loron aniversariu ida nee, hau lori MI/PM, hakarak parabeniza ita boot sira hotu ba imi nia servisu no dedikasaun tomak, neebe imi hatudu ona durante nee. Hau fiar katak, unidade ida nee sei sai diak liutan husi tempu ba tempu no sai solidu liutan hodi asegura seguransa ita nia maritima nomos fo Liberdade bai ita nia peskador sira, hodi halo aktividade iha tasi laran inklui movimentasaun tomak iha ita nia tasi leten. Parabens no sussesu liu tan ba Unidade Polisia Maritima,” Hakotu nia.

Iha biban nee, Komandante Unidade Polisia Maritima (UPM) Superintendente Eugenio Pereira, hateten iha loron 27, fulan Maiu, tinan 2003, Timor oan nebe servi iha Instituisaun PNTL, hahu simu rensponsabilidade ba Autoridade Polisia husi Polisia Nasoens Unidas nee nian.

Responsabilidade neebe PNTL assume, orienta liu ba iha misaun atu garante seguransa ba iha zona Maritima. Eventu ida ne akontese, hanesan parte ida nebe bele reforsa misaun iha instituisaun PNTL, tuir Mandatu Konstitusional neebe hetan ona aprovasaun husi asembleia konstituente.

Nia dehan, iha 2004, Governu, aprova dekreto Lei NO 09, Lei Organika Polisia Nasional Timor Leste, no promulga husi Prezidente Republika, transforma Unidade Seguransa Maritima bai ha Unidade Polisia Maritima, no define mos misaun nebe atribui ba Unidade Polisia Maritima, mak hanesan prevensaun no supresaun ba krime jeral no aktu ilisitu sira seluk, neebe akontese iha area kosteira, prevensaun no kombate polusaun tasi nenian, seguransa moris ema nian iha Tasi no mos rekursu tasi nee nian.

“Iha periodelu Governasaun premeiru ate oitavu Governo, iha nee nia Politika hodi Dezenvolve Instituisaun PNTL, Unidade Polisia Maritima hetan nee nia efeitu ba iha prosesu dezenvolvimentu, husi inisiu, UPM simu poder polisial husi Polisia Nasoens Unidas, ho rekursu neebe minimu, maibe ate ohin loron UPM kontinua hatudu ninia progresu dezenvolvimentu neebe signifikante,” dehan nia.

Aleinde nee, Unidade Polisia Maritima hetan tulun husi parseiru dezenvolvimentu sira, nomos Ajensia Internasional, sivil i militar neebe ho komitmentu boot kontinua apoiu Unidade Polisia Maritima ate ohin loron.

Undade Polisia Maritima iha faze ida neebe kontinua reforsa ninia misaun, hodi garante seguranasa iha teritoria Tasi Timor Leste, liu husi establesimentu Posto Vizilansia iha area kosteira, establese equipa neebe ho ninia misaun atu halo salvamentu e buska, bainhira sidadaun sira hetan dezastre iha teritoriu tasi Timor Leste ninian, halo patrulhamentu iha area neebe identifika hanesan potensias ba iha atividades peskas llegais, importasaun illegal sira, halao dezaminasaun ba informasaun neebe pertenete ba iha seguransa ema nian, wainhira halao atividades iha tasi, liu-liu ba komunidades sira neebe halao atividades peskas e mos utiliza transporte maritima husi Dili – Atauro (ba mai), no Dili Oe Cusse (Ba Mai).

Atividades sira ne hotu hanesan parte husi asaun prevensaun, neebe membrus Unidade Polisia Maritima, halao bazeia bai iha misaun neebe atribui ona iha Lei.

Aleinde husi atividades preventiva neebe Unidade Polisia Maritima halao, iha mos programa seluk neebe sai hanesan prioridade ba UPM, maka iha area kapasitasaun. Membrus Unidade polisia Maritima kontinua halao nenia programa ba tha atividades treinamentu iha area Navegasaun, Lei Internasional kona ba area Maritima, Buskas no salvamento, no mos iha area sekuk tan nebe pertenente ba iha servisu Unidade Polisia Maritima.

Entretantu, programa kapasitasaun hirak nee hotu, hetan apoiu husi parseiru dezenvolvimentu sira no inatituisaun, mak hanesan TLPDP, JICA, UNODC, KOIKA nomos komponente Naval (FFDTL).

(efi)

LEAVE A REPLY

Please enter your comment!
Please enter your name here